Турк, Сирийн газар нутагт 2023 оны хоёрдугаар сарын 6-нд болсон газар хөдлөлтийн улмаас 50 мянга гаруй хүн нас барсан билээ. Мөн 160 мянга орчим барилга нурж, 1.5 сая хүн орон гэргүй болжээ.

Тэгвэл уг газар хөдлөлтийн үеэр нурж, 72 хүний амийг авч одсон зочид буудлын эзэн болон архитекторт Туркийн шүүхээс хорих ял оноолоо. Энэ нь "Исиас Гранд" гэх зочид буудал юм. "Исиас Гранд"-ын эзэн Ахмет Бозкурт, архитектор Эрдем Йылмаз нарт тус бүр 18 жил таван сарын хорих ял оноожээ. Харин Бозкуртын хүү Мехмет Фатихад 17 жил дөрвөн сарын хорих ял оноолоо. Тэднийг санаатай, болгоомжгүй байдлаасаа болж нэгээс олон хүний амь насыг хохироосон гэж буруутгажээ.

Зүүн өмнөд Адъяаман хотод байрлах тус зочид буудалд газар хөдлөлтийн үеэр Туркийн хяналтад байдаг хойд Киприйн сургуулийн волейболын баг, жуулчны хөтөч нар байрлаж байсан юм.

"Исиас Гранд" нь Адъяаман хотын хамгийн алдартай зочид буудлуудын нэг байсан боловч хормын дотор нурсан. 2001 оноос хойш үйл ажиллагаа явуулсан тус зочид буудлыг барихдаа голын хайрга, элсийг бусад барилгын материалтай хольж, барилгын тулгуур багана үүсгэсэн байсныг шалгалтаар тогтоожээ.