Зул сарын гацуур модыг ой хөвчөөс тасдаж авчирдаггүй. Харин тусдаа тариалангийн талбайд тариалж, хурааж авдаг. Гэвч гацуур модны фермүүд уур амьсгалын өөрчлөлтөөс үүдэлтэй цаг агаарын гамшиг, хөдөлмөрийн зах зээлийн өөрчлөлт зэрэг аюултай нүүр тулаад байна.

АНУ-ын 50 мужид 15 мянга орчим ферм гацуур мод ургуулдаг бөгөөд тэдгээрт ойролцоогоор 350 сая мод ургадаг. Мичиган, Хойд Каролина, Орегон мужууд хамгийн олон акр гацуур модны фермтэй. АНУ даяар гацуур модны фермүүд 266,964 акр газрыг хамардаг.

Гэвч ган гачиг, хар салхи, түүнээс үүдэлтэй хөрсний гулгалт зэрэг нь модны үйлдвэрлэлд сөргөөр нөлөөлжээ. Хар салхины үеэр хөрсний гулгалт үүсэх нь модны хувьд жинхэнэ аюул байсныг тариаланчид хэлж байна. Яг нарийн тоо гараагүй байгаа ч газар тариаланчид болон эрдэмтэд бүс нутагт ургаж буй сая сая гацуур модноос олон мянган ширхэг нь хар салхинд алга болсон гэж таамаглав.

Агаарын хэмйн өсөлт, ган гачиг нь АНУ-ын зарим бүс нутаг, ялангуяа Номхон далайн баруун хойд хэсэгт хээрийн түймрийн шалтгаан болдог. Ялангуяа сүүлийн дөрөв, таван жилд уур амьсгалын өөрчлөлтөөс шалтгаалсан ойн түймэр олон удаа гарчээ. Хэт халалт фермд ургуулж буй гацуурнуудад ч сөргөөр нөлөөлдөг. Фермийн гацуур моднууд наранд түлэгдэж, олон суулгац нь үхдэг ажээ.

Гацуур модны бизнес эрхлэгчдэд тулгарч буй бас нэгэн аюул бол ажиллах хүчний хүрэлцээ. Гацуур модыг тарьж ургуулахад хөдөлмөр их шаарддаг бөгөөд цаг агаар ямар ч байсан ажиллах хэрэгтэй. Ихэнх хүн энэ шаргуу ажлаас нь халшрах хандлагатай байдаг аж. Хөдөө аж ахуйн бусад салбарын нэгэн адил гацуур модны фермүүд ургац хураах, тээвэрлэхдээ цагаачдын хөдөлмөрт тулгуурладаг.