Зул сарын баярын хүрээнд АНУ-ын дотоодын шилжилт хөдөлгөөн ид өрнөж байна. Гэвч "American Airlines" компанийн үйлдлийн системд техникийн саатал гарсны улмаас Мягмар гаригт төлөвлөгдсөн байсан бүх нислэг зогсжээ. Тус компанийн нислэг төлөвлөлтөөс эхлээд зорчигчдын суудлыг зохицуулдаг үндсэн программ алдаа зааж эхэлснээр орон даяар түр хугацаанд нислэг зогсооход хүргэж, энэ нь 3901 нислэгийн ердөө 36 хувь нь цагтаа нисч амжсаны дараахан болсон аж.

Холбооны Нисэхийн Захиргаа саатал гарснаас нэг цаг орчмын дараа "American Airlines" компани асуудлаа шийдвэрлэсэн гэж мэдэгдсэн ч Даллас-Форт Уорт, Нью-Йоркийн Кеннеди нисэх онгоцны буудал, Шарлотт зэрэг томоохон төвүүдэд саатал үргэлжилсээр байна. Олон зорчигч дамжин суух нислэгээсээ хоцорсон учир бухимдлаа илэрхийлсэн бөгөөд зарим нь өөр агаарын тээврийн компанийн нислэг захиалсан эсвэл төлөвлөгөөндөө өөрчлөлт оруулах шаардлага гарчээ. Түүнчлэн, өвлийн цаг агаар аялал жуулчлалд нөлөөлж, янз бүрийн бүс нутагт цасан шуурга, хүйтэн жавар зэрэг тогтворгүй байдал үүсгэж байна. Зул сарын баяраас шинэ он хүртэл дотоодын нислэг зогсолтгүй үргэлжилдэг бөгөөд энэ удаад нэгдүгээр сарын 2 хүртэл үргэлжлэх төлөвтэй байгаа аж. "TSA"-ийн мэдээлснээр, орон даяар 40 сая хүн аль нэг хот руу зорчиж байгаа бөгөөд Бостон, Нью-Йорк зэрэг хотуудад хурдны замын хөдөлгөөн ердийнхөөс 30 хувиар илүү нэмэгджээ.

Дашрамд дурдахад, энэ жилээс эхлэн агаарын тээврийн компаниуд зорчигчоос хамаарахгүй сааталд нислэгийн төлбөрийг автоматаар буцаан олгох болсон. Гэсэн хэдий ч, буцаан олголт хүлээхээс илүү өөр нислэг захиалах нь түргэн, оновчтой сонголт болж байгаа аж.