Шуудангийн марк дээр бүдүүлэг илэрхийлэл ховор ч Украины хамгийн алдартай марк бусдаас өөр. Тодруулбал, Украины шуудангийн "Укрпошта" компани эрсдэлтэй алхам хийж дайныг эсэргүүцсэн утга агуулгатай маркнууд хэвлүүлжээ. Тухайлбал, Могойт арал дээр Оросын байлдааны хөлөг рүү дунд хуруугаа гарган зогсч буй украин цэргийг уг марк дээр дүрсэлсэн байна. Энэ нь бүрэн хэмжээний довтолгоо эхэлсэн анхны өдрийн зураглал юм. Марк дээр дүрслэгдсэн "Москва" байлдааны хөлгийг украинчууд живүүлсэн. Марк нь ч бас гарснаасаа хойш долоо хоногийн дотор зарагдаж дуусчээ.

"Укрпошта" компанийн тэргүүн Игорь Смилянский эрсдэлтэй алхам хийснээ хүлээн зөвшөөрсөн юм. Тэрбээр "Энэ бол миний шийдвэр байсан. Бусдын юу гэж бодох хамаагүй. Би үүнийг зөв гэдэгт итгэсэн. Ингэж хийх нь дүрэм зөрчих ч гэлээ бид зөрчиж байна" гэжээ.

"Укрпошта"-аас гаргасан өөр нэг алдартай загвар нь Украины трактор олзлогдсон Оросын танкийг чирч буйг харуулсан марк юм. Уг марк дээр "Оройн мэнд, бид Украинаас ирсэн" гэж бичжээ. Дайны үеийн мэндчилгээ бүхий уг марк нь найман сая орчим борлуулагджээ.

Украины алдарт үнэрч нохой Патроны дүртэй маркнаас 500 мянган ам.долларын орлого олсны 80 хувийг нь мина цэвэрлэх төхөөрөмжид зарцуулсан байна. Үлдсэн хувийг нь амьтан хамгаалах байранд зарцуулжээ.

Алдарт граффити зураач Бэнси нийслэл Киев дэх халдлагад өртөн сүйдсэн нэгэн барилгын ханан дээр бүтээлээ үлдээсэн байдаг. Түүний зурсан уран нугараачийн дүрсийг марк дээр шинэчлэн хэвлэснээр багагүй ашиг орлого олж, тэсрэх бөмбөгөөс хамгаалах 10 байрны санхүүжилтыг босгожээ.

Дайны үеэр иргэдийн сэтгэл санааг өргөхийн тулд марк дээрээ хошин шогийн өнгө аяс оруулдаг гэж Игорь Смилянский хэлэв. "Хошигнол бол украинчуудын тулалдах хүч. Хамгийн хэцүү нөхцөлд ч гэсэн та аливааг хошин мэдрэмжээр хүлээж авах хэрэгтэй. Манай марк заримдаа үүнийг харуулдаг" гэж тэр хэлжээ.