Сирийн төв хэсэгт орших Сукайлабия хотын төв талбайд байрлуулсан гацуур модыг шатааснаас болж эсэргүүцлийн жагсаал өрнөжээ. Шинэ засгийн эрхийг барьж буй Хаят Тахрир аль-Шам бүлэг энэ үйл явдалтай холбоотойгоор гадаадын дайчдыг саатуулсан гэж мэдэгдээд байна. Тус бүлэг нь Сири дэх шашин шүтлэг, үндэстний цөөнхийн эрх, эрх чөлөөг хамгаалахаа амласан билээ.

Гэрчүүдийн мэдүүлснээр маск зүүсэн хүмүүс гацуур мод руу үл мэдэгдэх шингэн асгаж байжээ. Тэд галыг унтраах гэж байсан уу, улам асаах гэж байсан уу гэдэг нь тодорхойгүй байна.

Гацуур галдан шатаасан хэрэгтэй холбоотойгоор Мягмар гаригт Дамаск хотын хэд хэдэн хэсэгт олон хүн гудамжинд жагсчээ. Жагсагчдын зарим нь энэ явдлыг Сири дэх гадаадын дайчидтай холбон тайлбарлаж байна. Зул сарын баяр бол Христийн мэндэлсэн өдөр гэдэг учир шашны үзэл суртлын улмаас гацуурыг шатаасан байж болзошгүй.

Сири нь курд, армян, ассири, христийн шашинтнууд, друз, алавит шиа, арабын суннит зэрэг олон үндэстэн, шашны бүлгүүдийн өлгий нутаг. Мөн нийт сиричүүдийн олонх нь исламын шашинтнууд юм.