Мэргэжлийн сүмо бөхийн нэгдүгээр сарын Хацү башё тун сонирхолтой болох шинжтэй. Учир нь озэки Котозакүра болон озэки Хошорюү С.Бямбасүрэн нарын аль нэг нь түрүүлвэл эсвэл хоёулаа тун сайн барилдвал ёкозүна цол хүртэх гэнэ.

22 жилийн өмнө Хошорюү С.Бямбасүрэнгийн авга ах Асашорюү Д.Дагвадорж мөн түрүүлвэл ёкозүна цол хүртэнэ гэсэн болзолтой Хацү башёд барилдаж байсан түүхтэй. Тэр ч түрүүлээд зогсохгүй замналынхаа турш нийт 25 түрүү хүртэж, ёкозүна цолонд хүрсэн анхны монгол сүмоч болсон билээ.

Асашорюү Д.Дагвадорж 2003 оны Хацү башёд түрүүлсэнээр ёкозүна цол хүртсэн.

Тэгвэл өнөө цагт түүний авга дүү 25 настай, Хошорюү озэки цолны босго давж, ёкозүнад тулж ирээд байна. Тэрбээр өчигдөр/2024.12.24/ болсон хэвлэлийн бага хурлын үеэр "Би Асашорюү ахыгаа үргэлж ёкозүна гэхээсээ илүүтэйгээр миний авга ах гэж хардаг байсан. Одоо бодоход түүний хийсэн зүйлс үнэхээр л гайхалтай. Гэхдээ би түүн шиг байхаас илүүтэйгээр өөрийнхөөрөө баймаар байна" гэжээ.

Хошорюү С.Бямбасүрэнгийн ч бэлтгэл сайн байгаа сурагтай. Тэрбээр Токио хотод байрлах Тацүнами дэвжээн дээрээ жүрёо зиндааны бөхтэй 17 барилдахдаа 14 удаа давсан гэнэ.

Өнгөрсөн арваннэгдүгээр сард Хошорюү дээд зиндаанд хоёр дахь удаагаа түрүүлэх боломжоо алдаж, сүүлийн шийдвэрлэх өдрийн барилдаанд озэки Котозакүрад ялагдсан билээ.

Одоогоор мэргэжлийн сүмод барилдаж буй цор ганц аварга Тэрүнофүжи Г.Ган-Эрдэнэ бэртэл, гэмтлийн улмаас барилдах боломж хомс байгаа учир сүмогийн холбоо дараагийн ёкозүнаг тодруулах ажлаа яаравчлуулж байна. Тиймээс л озэки Котозакүра болон озэки Хошорюү С.Бямбасүрэн нарт ёкозүна цолны болзол тавьжээ. Хэрэв тэд хоёулаа ёкозүна цол хүртвэл 1970 оноос хойшхи анхны тохиолдол болно. Тухайн үед Китанофүжи, Таманоүми нар хамтдаа ёкозүна болж байв.

Хошорюү С.Бямбасүрэн ёкозүна цолны талаар бодож, гол зорилгоо болгоогүй аж. Тэрбээр энэ талаар "Би ёкозүна цол гэх мэт зүйлийн талаар бодохгүйгээр өөрийнхөө барилдаанд л анхаарлаа төвлөрүүлэхийг хүсч байна. Юуны өмнө би бүх зүйлийг өөрийнхөөрөө хийхийг хүсдэг" гэлээ.