“BMW” компани олон улсын хориг арга хэмжээг үл харгалзан ОХУ-д дээд зэрэглэлийн 100 гаруй автомашин нийлүүлснээ хүлээн зөвшөөрчээ.Украин дахь бүрэн хэмжээний түрэмгийлэл эхэлсний дараа Оросын автомашины экспортод хориг тавьсан билээ. Энэхүү хоригийг тойрч, үнэтэй автомашин нийлүүлсэн явдалд “BMW” компани Хановер дахь салбарынхаа ажилтнуудыг буруутгасан байна. Мөн зөрчил гаргасан бүх ажилтныг халж, хориг арга хэмжээний дагуу цаашдын хүргэлтийг зогсоосон гэлээ.

Энэ асуудал нь бараа бүтээгдэхүүний эцсийн цэгийг хянахад амар байдаггүйг харуулна. Экспортлогчид хориг арга хэмжээг техникийн хувьд дагаж мөрдөж байгаа ч Орост барууны гаралтай бүтээгдэхүүнүүд гарч ирсээр л байна.

Хориг арга хэмжээнээс шалтгаалаад Европоос Орос руу хийх шууд экспорт буурсан. Нөгөөтэйгүүр ОХУ-тай худалдааны нягт холбоотой боловч хориг арга хэмжээнд өртөөгүй улс орнууд руу хийх экспортын хэмжээ өссөн байна. Тэгэхээр барууны бараа бүтээгдэхүүн эдгээр гуравдагч орноор дамжин ОХУ-д ирдэг байх магадлалтай. Үүнийг “арын хаалганы экспорт” гэж нэрлэнэ.

“BMW”-ийн машинууд ч ийм арга замаар Орост ирсэн гэж үзэж байна. 2023 оны эхний есөн сард 2019 оны мөн үетэй харьцуулахад Германаас Киргиз рүү экспортын автомашины хэмжээ 5500 хувиар өсчээ. Цаашилбал, Германы автомашины эд ангиудын экспорт Казахстан, Армен, Гүрж зэрэг улсад тус тус 720, 450, 340 хувь нэмэгдсэн байна. Төв Азийн зарим улсад очсон гэх Германы экспортын барааны бүртгэл нь цаад улсынхаа импортын бүртгэлтэй таарахгүй байгаа явдал ч гарсан. Эндээс харвал тухайн улсууд нь жинхэнэ хүлээн авагч биш болох нь илэрхий юм.