Олон нийтийн сүлжээнд багш сурагчаа зодож буй бичлэг цацагдсан. Үүнтэй холбогдуулан багшийн ёс зүйн тухай асуудал нийгэмд шүүмжлэл дагуулаад байна. Энэ талаар Боловсролын ерөнхий газар /БЕГ/-ын дарга  Т.Ням-Очироос тодрууллаа.

Тэрбээр "Өчигдөр болсон асуудлын тухайд бид цаг алдалгүй мэдээлэл авч, сургуулийн удирдлага, холбогдох байгууллагаас мэдээллийг тодруулаад явж байна. Энэ бол харамсалтай хэрэг. Бидэнд ирүүлсэн мэдээллээр тухайн сургуулийн ёс зүйн зөвлөл өнөөдөр өглөө хуралдсан байна. Журмын дагуу багш, ажилтны төлөөлөл бүрдсэн 5-7 хүний бүрэлдэхүүнтэй ёс зүйн зөвлөл ажиллах ёстой. Үүний дагуу хуралдсан. Ёс зүйн зөрчил гаргасан багш ёс зүйн зөрчил гаргасан гэдгээ хүлээн зөвшөөрч, өөрийн хүсэлтээр ажлаа өгсөн. Гэхдээ энэ бол нэг удаагийн ажлаас чөлөөлөгдөөд өнгөрөх асуудал биш. Тухайн анги бүлгийн хүүхдийн сэтгэл зүйн асуудал, эцэг эх, асран хамгаалагчийн болгоомжлол айдсын асуудал хөндөгдөж байна. Тэгэхээр хамгийн гол нь дахин давтагдахгүй байх дээр анхаарах шаардлагатай. Асуудлыг бүх талаас нь харах хэрэгтэй. Тухайн багшийн багшлах эрхийг цуцлах, дахиж өөр сургуульд ажиллах боломжтой эсэх дүгнэлтийг мэргэжлийн байгууллага гаргана.

Одоо мэргэжлийн байгууллагууд, мэргэжлийн комисс дүгнэлтээ гаргана. Цагдаагийн байгууллага, хүүхдийн эрхийн мэргэжлийн байцаагч нар ажиллаж байна" гэв.