Шинэ жилийн уур амьсгал орж, аж ахуйн нэгж, албан байгууллагын баярын өдрүүд үргэлжилж байна. Мөн идэр есийн хүйтэн эхэлж, хүйтний эрч чангарч буй энэ өдрүүдэд Гэмтэл согог судлалын үндэсний төвийн ачаалал нэмэгдэж байгаа аж. Тодруулбал, ГССҮТ-д архи хэтрүүлэн хэрэглэж улмаар гар хөлөө хөлдөөсөн, халтирч унаж бэртэж, гэмтсэн иргэдийн тоо эрс нэмэгдэж байгааг тус эмнэлгийн яаралтай түргэн тусламжийн эмч хэлэв. Өөрөөр хэлбэл, баяр ёслол болж байгаатай холбоотой архи, согтууруулах ундаа хэтрүүлэн хэрэглэх, улмаар осгож хөлдөх явдал нэлээд гарч байгаа юм байна.

Гэмтэл согог судлалын үндэсний төвөөр өдөрт 400 гаруй хүн яаралтай тусламж үйлчилгээ авч байгаа ажээ.

Иргэд согтууруулах ундаа хэрэглэсэн үедээ ихэвчлэн гавал, тархины гэмтэл авдаг байна. Учир нь согтуу хүн савж унах үед ямар ч өөрийгөө хянах чадваргүй байдаг тул илүү гэмтдэг аж. Өөрийгөө хянах чадваргүй учраас шууд гэртээ харьчихдаг, маргааш нь бүр хүндрээд эмнэлэгт очих тохиолдлууд гардаг байна. Энэ нь эмнэлзүйн хувьд хүндрэх эрсдэлтэйг эмч нар анхааруулж байгаа юм.
Арванхоёрдугаар сарын 1-10-ны хооронд архи согтууруулах ундаа хэрэглэсэн үедээ гэмтэж бэртсэн нийт 358 хүн ГССҮТ-ийн Яаралтай тусламжийн тасагт тусламж үйлчилгээ авчээ. Нийт тохиолдлын 274 нь эрэгтэй байсан бол 84 нь эмэгтэй байжээ. Мөн эдгээр өдрүүдэд нийт 14 хүн осголт, хөлдөлтийн улмаас ГССҮТ болон салбар эмнэлгийн Яаралтай тусламжийн тасагт тусламж үйлчилгээ авчээ. 14 хүний гурав нь 0-18 насны хүүхэд бөгөөд чих, хурууны үзүүр, хацраа хөлдөөсөн бол гурван эрэгтэй архи ууснаас болж осгосон байна.

Согтуу хүн гадаа -20 хэмд 20 минут байхад хөлдөх эрсдэлтэй гэнэ.

Эмч нарын зүгээс баяр ёслолын өдрүүдэд архи, согтууруулах ундааг зохистой хэрэглэхийг анхааруулав.  Мөн сургуулийн хүүхдүүд амарч байгаа энэ үед түлэгдэх, унаж гэмтэх, осгож хөлдөх тохиолдол нэлээд нэмэгддэг байна. Тиймээс эцэг эх, асран хамгаалагч нар бага насны хүүхдэдээ тавих хараа хяналтаа сайжруулах шаардлагатайг сануулав.