Оросын хөлбөмбөгийн шигшээ баг ирэх 2026 оны дэлхийн аваргад оролцох боломжтой гэнэ. Энэ талаар тус улсын хөлбөмбөгийн холбооны ерөнхийлөгч Александр Дюков сэтгүүлчдэд ярьжээ. Тэрбээр хэлсэн үгэндээ "ФИФА, УЕФА хоёр 2022 онд тавьсан хоригоо цуцалж байж л бид ирэх дэлхийн аваргын төлөөх эрхийн төлөө тоглоно. Шийдвэрээ цуцлаагүй байгаа учир сугалаанд оролцох боломжгүй байна. Гэхдээ тоглолтууд нь эхлээгүй байгаа тул бидэнд боломж байна" гэв.

2026 оны хөлбөмбөгийн ДАШТ Канад, Мексик, АНУ гэсэн гурван улсад болно. Нийт 48 улсын шигшээ баг оролцох учир өмнө нь оролцож байгаагүй улсуудад боломж гарч ирсэн.

Өнгөрсөн сард Оросын усанд сэлэлтийн 27 тамирчин цагаан тугийн дор дэлхийн аваргад оролцсон билээ. Мөн Оросын уран гулгалтын тамирчид ирэх 2026 оны өвлийн олимпод оролцох магадлал өндөр байна. Үүнээс нь харахад олон улсын спорт холбоод Оросын баг, тамирчдын эсрэг тавьсан хоригоо сулруулж байгаа харагдана.

Хоригт орсон Оросын хөлбөмбөгийн шигшээ баг 2022 оноос хойш том багуудын эсрэг нөхөрсөг ч тоглолт хийсэнгүй. Тэд одоогоор Киргизстан, Тажикстан, Узбекистан, Иран, Ирак, Камерун, Кени, Куба, Серби, Беларусь, Вьетнам зэрэг улсуудтай тогложээ.

Орос улс 2018 оны ДАШТ-ийг эх орондоо зохион байгуулсан билээ.