Германы Магдебург хот дахь зул сарын зах Баасан гаригийн орой автомашинтай этгээдийн халдлагад өртжээ. Захаар хэсч явсан хүмүүсийн дундуур машинтай этгээд дайран орсноор таван хүн нас барж, 200 гаруй хүн гэмтэж бэртэв. Гэмтэж бэртсэн хүмүүсийн 41-ийнх нь биеийн байдал хүнд байгаа гэлээ.

Халдлагын сэжигтнээр нэг эрэгтэйг баривчилжээ. Германы хэвлэлд мэдээлснээр тухайн этгээд нь Магдебургаас өмнө зүгт 40 км зайд орших Бернбургт оршин суудаг Талеб А гэгч юм. Тэрбээр сэтгэцийн эмч мэргэжилтэй аж. Түүний халдлагын шалтгаан тодорхойгүй байна. Саудын Араб гаралтай Талеб А нь 2006 онд Германд ирж, 2016 онд дүрвэгчээр хүлээн зөвшөөрөгджээ.

Цахим сүлжээнд тарсан бичлэгээс харвал хар өнгийн "BMW" машин унасан хүн зул сарын захаар хэсч буй хүмүүсийн дундуур өндөр хурдтай давхиж орж ирсэн байна. Гэрчийн мэдүүлснээр тухайн машины араас цагдаагийн машин ч хөөж орж иржээ. Тухайн зах нь бетон блокоор хашаалагдсан бөгөөд явган хүний зам нь машин явахуйц өргөн зайтай.

Сэжигтэн этгээдийг исламын шашинтнуудаас айх, дайсагнах, үзэн ядах эмгэгтэй гэж Германы Дотоод хэргийн сайд Нэнси Фисер хэлжээ. Учир нь тухайн этгээд цахим сүлжээндээ исламын шашинтнуудыг ил тодоор шүүмжилдэг байжээ.

Энэ хэргийн улмаас Магдебургийн зул сарын захыг хаажээ. Энэ жилийн хувьд Магдебургийн зул сар ингээд дуусч байна.