Өмнөд Солонгос улс 2025 онд 130 мянга хүртэлх гадаадын иргэнийг тус улсад ажиллах зөвшөөрлийн тогтолцооны дагуу ажиллах боломжийг олгохоор шийдвэрлэжээ. Энэ нь ажиллах хүчний хомсдолд орсон тодорхой салбарт гадаадаас ажилчин авах боломжийг олгох юм. Тус улсын Хөдөлмөр эрхлэлтийн яам Баасан гаригт мэдэгдэл гаргаж, Хөдөлмөр эрхлэх зөвшөөрлийн тогтолцооны дагуу ирэх онд ажилд авах ажилчдын тоог 130 мянга байхаар тогтоосон нь энэ оны 165 мянгаас буурсан үзүүлэлт юм.

Хөдөлмөр эрхлэх тогтолцоог 17 түнш оронтой хамтран 2004 онд байгуулсан бөгөөд тухайн үед ажиллах хүчний хомстолд орсон ажил олгогч нарын шаардлагын дагуу бий болгож байжээ. Тажикстан улс ирэх жил уг тогтолцоонд нэгдэх аж.

Уг системийн дагуу "Е-9" визтэй хүмүүс ажиллах хүчний хомсдол их байгаа үйлдвэрлэл, барилга болон бусад аж үйлдвэрийн салбарт ажиллах боломжтой.

Ирэх онд авах гадаад ажилчдын тоог ажиллах хүчний эрэлтийн тоон дээр үндэслэн гаргасан гэж яамнаас мэдээлжээ.

Аж үйлдвэрээр нь авч үзвэл, Солонгосын үйлдвэрлэлийн салбарт 72 мянга хүртэлх ажилчин, хөдөө аж ахуй, сүүний үйлдвэрт дээд тал нь 10 мянга, загас агнуур 8500, үйлчилгээ 3000, усан онгоцны үйлдвэрлэл 2500, барилга 2000 зэрэг хүн ажиллах боломжтой болно. Үлдсэн 32 мянган визийг эдгээр салбараас хүсэлт гаргавал олгох боломжтой гэж яамнаас мэдээллээ. Мөн тус яам ирэх онд 75 мянган гадаадын иргэнд "Е-8 виз" олгохоор төлөвлөжээ. Уг схемийн дагуу цагаач ажилчдад найман сар хүртэлх хугацаанд ажиллах зөвшөөрөл олгодог.