Өвлийн хүйтэнд хашаа байшин нь усанд автаж, хүн амьдрах аргагүй болжээ. Эзэнгүй хашааг уяатай ганц нохой сахина. Нийслэлийн Сонгинохайрхан дүүргийн есдүгээр хороо буюу Зүүнсалааны "Малчны гудамж" өвөл болохоор хөрсний усанд автаж, орон гэрээсээ дайжихад хүрдэг болсон байна.

Гудамжаар нь ганц нэг оршин суугч алхах бөгөөд халтирч унахаас болгоомжлон явж үзэгдэнэ. Сургуулиасаа тарж яваа багачууд нэг нэгнээсээ зуурч, мөсөн дээр гулган тоглох. Эндхийн найман айл усанд автаад 10 гаруй хонож байгаа гэнэ.

"МАНАЙ ГЭР УСАНД АВТВАЛ ӨӨР АЙЛ РУУ НҮҮНЭ"

Тус хорооны оршин суугчид өвөл болохоор булгийн ус хальж, халиа тошинд автдаг тухайгаа учирлаж байв. Оршин суугч Ч.Гэрэлмаагийнх 10 гаруй жил тус хороонд амьдарч байгаа аж. Тэрбээр "Анх энэ газрыг худалдан авахад халиа тошин үүсдэггүй байсан. Гэтэл сүүлийн жилүүдэд өвөлдөө хөрсний ус гарч ирээд, амьдрахад хэцүү байна.

Өнгөрсөн өвөлэнэ хавь усанд автаж, мөстсөн. Энэ жил булгийн ус хальж, манай хашаа руу орсон.

Одоогоор манай гэр рүү ус хальж ороогүй байна. Ойр орчмын айлууд усанд автаж, гэртээ амьдрах аргагүй болоод "дүрвэсэн". Манайх усанд автвал өөр тийшээ нүүнэ гэж бодож байгаа. Ирэх хавраас хашаагаа зарж, өөр газар амьдрах бодолтой байна. Зун үер ус гайгүй хэрнээ өвөл ийм асуудал үүсэх юм.

Томчуудаас гадна сургуулийн сурагчид энэ гудамж талбайгаар явахад бэртэж, гэмтэх эрсдэлтэй.

Онцгой байдлаас энэ хавийн айлуудад шаардлага ирүүлсэн. Манайх дүүргийн онцгойтой уулзахад тог цахилгаангүй, нийтийн тээвэр явдаггүй газар руу нүүх шаардлагатай гэж хэлсэн" гэв.

Гудамжаар бээцийн алхах ахмад настан Б.Мөнхтуяа "Би хөдөөнөөс ирээд хоёр хонож байна. Гэр хорооллын айлууд тун хэцүү орчинд амьдарч байна. Гэр орон нь усанд автаж, гудамж нь мөстөөд явахын арга алга" гэлээ.

"ЭНЭ ЖИЛ ХАЛИА ТОШИН ХАРЬЦАНГУЙ ЭРТ ҮҮСЧ, ХАЛЬЖ БАЙНА"

Дүүргийн онцгой байдлын хэлтсээс ус зайлуулах зурвас гаргаж, усыг гадагшлуулан далан босгож айлуудыг усанд автахаас хамгаалжээ. Нийслэлийн Сонгинохайрхан дүүргийн хувьд л гэхэд есөн хорооны 14 байршилд халиа тошин үүсч, мөстсөн гэдгийг албаныхан мэдээлж байгаа юм.

Тодруулбал, тус дүүргийн хоёр, дөрөв, долоо, ес, 24, 35, 40, 41 дүгээр хороо гээд нийт есөн хорооны нутаг дэвсгэрт хөрсний болон булгийн ус хальж, халиа тошин үүсчээ.

Эдгээр байршлуудад ямар ажил хийж буй талаар нийслэлийн СХД-ийн Онцгой байдлын хэлтсийн Гамшгаас хамгаалах улсын байцаагч Д.Билгүүнээс тодруулахад "Онцгой байдлын алба хаагчид нийт 530 метр талбайн мөсийг хагалж, тээвэрлэсэн. Мөн 19 айлын хашааанд суваг татаж, далан босгон айлуудыг усанд автахаас хамгаалсан. Гэсэн хэдий ч халиа тошин нэмэгдэж, айлууд руу орох эрсдэл өндөр байна. Манай дүүргийн хувьд нийт 61 нэгж талбарт халиа тошингийн эрсдэлтэй бүс үүссэн. Энэ жилийн хувьд халиа тошин харьцангуй эрт үүсч, хальж байна" гэв.

ӨНГӨРСӨН ЖИЛ НИЙСЛЭЛИЙН 22 ХОРООНЫ 33 БАЙРШИЛД ХАЛИА ТОШИН ҮҮССЭН

Өнгөрсөн жил нийслэлийн 22 хорооны 33 байршилд халиа тошин үүсч, гамшгийн шар түвшин тогтоосон байна. Тиймээс нийслэл, дүүргийн холбогдох байгууллагын 284 ажилтан, алба хаагч, 48 техник хэрэгсэлтэй 8460 метр суваг шуудуу татаж, 401 тонн мөсийг гаргаж тээвэрлэн, далан босгох ажлыг хийж, 205 өрхийг ус, мөсөнд автах эрсдэлээс сэргийлж ажилласан талаар мэдээлж байсан юм.

Өнгөрсөн онд сүүлийн 30 жилийн дунджаас их хэмжээний хур тунадас орсон. Мөн огцом хүйтэрч эсвэл дулаарах зэргээр цаг агаарын хэм хэлбэлзэж байгаа нь халиа тошин үүсэх, цаашлаад шар усны үер болох эрсдэлийг бий болгож байгааг мэргэжилтнүүд онцолж байв.

Гэрэл зургийг О.Болорсувд