Лондонгийн "Royal Ballet"-ын од асан Сергей Полунин гэр бүлийн хамтаар Оросыг орхихоор шийдсэнээ зарлалаа. Украин гаралтай тэрбээр Оросын ерөнхийлөгчийг дэмжигч бөгөөд цээж болон хоёр мөрөн дээрээ Путины царайг шивүүлсэн гэдгээрээ алдартай. Өдгөө 35 настай тэрбээр Оросыг орхих болсон шалтгаанаа тодорхой хэлээгүй ч өөрийг нь хэн нэгэн дагаж мөрдөөд байна гэж өнгөрсөн зун ярьж байжээ.

Полунин Лхагва гаригт инстаграм хуудсандаа "Миний Орост байх хугацаа аль эрт дууссан. Үүрэг даалгавраа биелүүлж дууссан мэдрэмж төрж байна. Миний байх ёстой газар энэ биш гэдгээ мэдрэх цаг ирдэг юм байна" гэжээ.

2014 онд ОХУ Крымийг өөртөө нэгтгэхэд цэргийн ажиллагааг дэмжсэн алдартнуудын нэг нь Полунин байлаа. Улмаар 2019 онд Оросын иргэншилтэй болж, Крымийн Севастополь дахь бүжгийн академийн даргын үүрэг гүйцэтгэгчээр томилогдсон. Балетыг хөгжүүлэн дэлгэрүүлэхэд оруулсан түүний хувь нэмрийг Путин үнэлж, өнгөрсөн жил одонгоор шагнажээ. Түүнчлэн энэ оны эхээр Путины сонгуулийн кампанит ажилд Полунин оролцсон байна.

Энэ мэтчилэн Путинтэй ойр холбоо хамааралтай байсан боловч наймдугаар сард бүжгийн академийн тэргүүнээр түүний оронд Большой театрын балетчин асан Мария Александроваг томилжээ.

Полунин хувь хүний үзэл бодлоосоо болоод янз бүрийн шүүмжлэлд өртдөг ч балетын карьер нь гайхалтай байв. Тэрбээр 13 настайдаа Лондонгийн "Royal Ballet" сургуульд суралцах тэтгэлэг авчээ. Шивээс болон тэрслүү зангаасаа болоод "балетын муу залуу" гэж нэрлэгдэх болсон Полунин 2012 онд алдар нэрийн ид оргил үедээ "Royal Ballet"-аас татгалзсан юм.