Кремлийг шүүмжлэгч Владимир Кара-Мурза "Берлиний эмнэлэгт хэвтэн эмчлүүлж буй ээжийнх нь бие хорноос болж муудаагүй" гэж мэдэгджээ. Тодруулбал, түүний ээжийг цагдаа нар эмнэлэгт хүргэж өгсөн бөгөөд хүн амины гэмт хэргийн хохирогч болох гэж байсан байх магадлалтай гэсэн юм. Цагдаагийн хэвлэлийн төлөөлөгч Франс Пресс агентлагт хэлэхдээ, тухайн эмэгтэй Герман-Оросын давхар иргэншилтэй бөгөөд түүнийг хордуулсан гэж сэжиглэж байна гэжээ. Түүнчлэн уг хэрэгтэй давхцан Германы хэвлэлүүд эмнэлэгт хүргэгдсэн эмэгтэй нь Кара-Мурзагийн ойрын хамаатан гэж мэдээлэх болов.

Гэсэн хэдий ч Кара-Мурза өөрийн "Telegram" сувгаар хийсэн мэдэгдэлдээ "Ээж минь Берлиний эмнэлэгт хэвтэж байгаа нь үнэн. Гэхдээ хордсоны улмаас зүрхний шигдээс болсон гэх дүгнэлт худлаа. Бурхандаа талархъя. Эмч нар түүнийг үргэлжлүүлэн шинжилгээнд хамруулж байгаа" гэжээ. Берлиний цагдаагийн алба мөрдөн байцаалтын хүрээнд ээжийнх нь орон гэр, хувцас болон цусанд шинжилгээ хийж, нотлох баримт цуглуулж байгаа аж.

Кара-Мурза өөрөө хоёр удаа санаатайгаар хордуулах ажиллагаанаас амьд гарч чадсан бөгөөд энэ зун Оросын шоронгоос суллагдсан юм. Сүүлийн жилүүдэд хилийн чанадад хэд хэдэн удаа хордуулах гэмт хэрэг гарсан бөгөөд үүнийг Оросын захиалгаар хийгддэг гэх сэжиг гарах болсон. 2020 онд Герман Оросын сөрөг хүчний удирдагч Алексей Навальныйг мэдрэлд нөлөөлөх "Новичок" хэмээх бодисоор хордуулсан гэж үздэг. Тэрээр хоёрдугаар сард Арктикийн шоронгийн колонид тодорхойгүй нөхцөл байдалд нас барсан юм. Мөн 2018 онд Оросын давхар агент асан Сергей Скрипаль болон түүний  охин нь Новичокт хордсон гэж Их Британийн цагдаа нар мэдэгдэж байжээ.