Улсын төсөв батлагдсан тул улс төрийн намууд албан тушаалын тохироондоо орцгоожээ. Ялангуяа шинэ оны дараа дипломат албанд халаа сэлгээг өргөн хүрээнд хийхээр болсон байна. Тодруулбал, удахгүй Элчин сайд нарыг эгүүлэн татах, томилох асуудал Засгийн газрын хуралдаанаар орно гэсэн хүлээлт байна. Тиймээс ч, гадаадад Элчин сайд, консулаар явах өргөдлөө халаасалсан хүмүүс Төрийн ордноор багагүй гүйдэлтэй болсон аж.

Улсын төсөв хэлэлцэх үеэр Гадаад харилцааны сайд Б.Батцэцэг дипломат албаны цалин маш бага тулд мэргэжлийн, мэргэшсэн хүмүүсээ алдах эрсдэл нүүрлэснийг сануулж байв. Гэхдээ цалин мөнгөнөөс илүү Монголын дипломат албаны боловсон хүчний нөөцөд сөргөөр нөлөөлж буй гол асуудал нь улс төрийн томилгоо.
Үндсэндээ, Монгол Улсын төрийн гадаад бодлогын зорилт, чиг үүргийг хэрэгжүүлэх үүрэгтэй дипломат алба улстөрчдийн ураг төрлийн томилгоо, албан тушаалын тохирооны газар болж хувирсан.

Төрийн ордны “тамхины цэг”-ийн мэдээллээр шинээр Элчин сайд болон консулаар 50 орчим хүнийг томилох асуудал улс төрийн намын дарга нарын төвшинд яригдаж буй агаад олон хүн амбицтай байгаа аж.

УИХ-ын сонгуульд нэр дэвших эрхээ намаасаа авч чадаагүй, эсвэл тойрогт өрсөлдөөд өвдөг шороодсон, мөн намдаа хандив мөнгө өгсөн ч жагсаалтын гадуур үлдсэн гэх мэт шалтаг, шалтгаан тоочсон хүмүүс гадаадад Элчин сайдаар явахын тулд намын дарга нараа багагүй шахаж, шантаажилж байгаа гэх мэдээлэл ч бий.

Жишээ нь, Турк улсад Элчин сайдаар явахаар хоёр хүн амбицалж буй нь нэг нь МАН-ын гишүүн, Эрүүл мэндийн сайд асан Д.Сарангэрэл. Нөгөө нь АН-ын гишүүн Ш.Жандос аж.

Германд суух Элчин сайдаар “Эрдэнэт үйлдвэр”-ийн Ерөнхий захирал Г.Ёндонг зүтгүүлж байгаа гэх. УИХ-ын сонгуулийн үеэр С.Зоригийн аллагын талаар цуврал ярилцлага хийсэн Ерөнхий сайдын ажлын албаны ажилтан, түүхч Ч.Содбилэг БНАСАУ-ын дипломат ажилтнаар томилогдсон.

Тэгвэл секс скандалын хэрэгт нэр холбогдож, дэлхий даяар дуулиан тарьсан Үндсэн хуулийн цэцийн дарга асан Д.Одбаярыг Хонгконгд суух Ерөнхий консулаар, АН-ын гишүүн Ц.Жадамбаад Монгол Улсаас Бүгд найрамдах Солонгос улсын Бусан хотод суух Ерөнхий консулаар томилсон. Эрээний консулаар ХҮН намаас н.Лхагвадорж гэж хүн явж байгаа билээ. АН-аас Ц.Буяндэлгэр, Ц.Одонтунгалаг, Д.Эрдэнэбат гэх хүмүүсийн нэр дуулдаж буй. МАН-аас Ц.Цэрэнпунцаг, П.Анужин, Ц.Мөнхцэцэг, Б.Баярсайхан нар ч Элчин сайд болох амбицтай яваа бололтой. Ямар ч байсан шинэ оны дараа гадаад томилгооны асуудал улс төрийн хүрээний дуулиант сэдэв болж магадгүй байна.

Б.БАТ