Хойд Солонгосын цэргүүд нисгэгчгүй нисэх онгоцны аюулыг бүрэн ухамсарлахгүй байгаа учраас амь үрэгдэж буйг Украин мэдээлэв. Туршлагатай цэргүүд нисгэгчгүй онгоцноос айхаа мэддэг бол Хойд Солонгосын цэргүүдийн хувьд дайны туршлага дутмаг, хэлний бэрхшээлээр тусгаарлагдсан зэрэг хүчин зүйл бий. ОХУ-ын Курск мужид тулалдаж буй Украины эх сурвалжийн мэдээлснээр Хойд Солонгосын цэргүүд нисгэгчгүй онгоц болон бусад зэвсгээр хамгаалагдсан байршил руу шууд давшсан аж.

"Бид маш их гайхсан. 40-50 хүн талбай дээгүүр ингэж гүйлдэхийг хэзээ ч харж байгаагүй. Задгай талбайд тэд нисгэгчгүй онгоц, их буу болон бусад зэвсэгт оногдсон. Үр дүн нь ойлгомжтой" гэж тухайн эх сурвалж ярьжээ. Мөн хойд солонгос цэргүүдийн хариу үйлдэл үзүүлэх чадвар нь удаан байгаа аж. Хачирхалтай энэ байдал нь компьютер тоглоомыг хамгийн амархан үе дээр нь тоглож байгаа мэдрэмжийг төрүүлсэн гэв.

Хойд Солонгосын цэргүүд ноцтой хохирол амссан учир Украины нисгэгчгүй онгоцнуудын довтолгооноос эмээж, нэмэлт ажиглалтын цэг байгуулсан байна.

Хойд Солонгосын цэргүүд фронтын шугам руу шилжиж, байлдааны ажиллагаанд идэвхтэй оролцож буйг Үндэсний аюулгүй байдлын зөвлөлийн хэвлэлийн төлөөлөгч Жон Кирби Даваа гаригт мэдээлсэн. Курск мужийн Плехово, Ворожба, Мартыновка тосгоны ойролцоо өнгөрсөн амралтын өдрүүдээр болсон тулаанд Хойд Солонгосын 30 гаруй цэрэг амиа алджээ.