Хуучин гэрээний арван зарлигийг бичсэн хамгийн эртний таблет нь Лхагва гаригт 5.04 сая доллараар зарагджээ. Энэ нь дуудлага худалдааны төвөөс таамаглаж байсан үнийн дүнгээс хоёр дахин илүү мөнгөн дүн аж.  Уг чулуу нь 1500 орчим жилийн тэртээ Ром-Византийн үед хамаарах бөгөөд дуудлага худалдаа 10 гаруй минутын турш үргэлжилж, өөрийн болгох гэсэн худалдан авагч нарын дунд өрсөлдөөн бий болгожээ.

Зохион байгуулагч Нью-Йоркод төвтэй "Sotheby’s"-ийн мэдээлснээр, уг чулуун хавтанг нэрээ нууцалсан хүн худалдан авсан бөгөөд Израилийн байгууллагад хандивлахаар төлөвлөж байгаа аж.

Эртний ертөнцийн гайхалтай олдвор уг олдвор нь 52 килограмм жинтэй, 60 сантиметр өндөр бөгөөд 1913 онд одоогийн Израилийн өмнөд хэсэгт төмөр замын шинэ шугам барих малтлагын үеэр олж илрүүлжээ. Шинжээчдийн үзэж буйгаар, чулуун хавтан олдсон газрын ойролцоо эртний сүм хийд, синагог байрлаж байсан тул Самаричуудын аравдугаар тэмдэглэл гэж нэрлэгддэг байсан.

Самаритан шашин бол Хуучин гэрээний эхний таван ном дээр үндэслэсэн эртний, монотеист шашин юм.

Хэдийгээр иудаизмтай холбоотой боловч самаритан шашин нь орчин үеийн Баруун эрэгт байдаг Геризим уулыг Еховагийн оршин суух газар гэж үздэг. Гэхдээ уг чулуун хавтан хаанаас ч олдсон бай МЭ 400-600 оны Ромын довтолгооны улмаас эсвэл 11-р зууны сүүлчээр болсон загалмайтны аян дайны үр дүнд бүрэн бүтэн байдлаа алдсан гэж "Sotheby’s" тайлбарлав. Өнгөрсөн жил тус дэлгүүрт 1000 гаруй жилийн настай Еврей Библи 38.1 сая ам.доллараар зарагджээ. 9-р зууны сүүл эсвэл 10-р зууны эхэн үед хамаарах "Codex Sasoon"-ийг хүн төрөлхтний түүхэн дэх хамгийн чухал бөгөөд онцгой бичвэрүүдийн нэг гэж тодорхойлдог.