Сербийн нийслэл Белград хот ирэх оны нэгдүгээр сарын 1-ний өдрөөс эхлэн бүх иргэдэд нийтийн тээврийг үнэгүй болгож байна. 1.7 сая хүн амтай Белград нь газар доорх тээврийн системгүй Европын цөөн хэдэн нийслэлийн нэг. Люксембург болон Эстонийн Таллин зэрэг нийтийн тээврээ үнэгүй болгож байсан Европын орон хэд хэд байдаг.

Белградын хувьд автомашин ихтэй, иргэд нь зам дээр хэдэн цагаар түгжирч зогсдогоороо алдартай. Өнгөрсөн 10 орчим жилийн хугацаанд Белградын автомашины тоо 250 мянгаар нэмэгджээ. 2021 оны байдлаар Белградын бүртгэлтэй автомашины тоо нь 640 мянга давсан байна. Харин нийт Серби улсын хэмжээнд бүртгэлтэй автомашины тоо 2023 онд 2.8 сая дөхжээ.

Эрх баригчид 2030 он гэхэд метроны систем нэвтрүүлнэ гэж үзэж буй ч өнөөдрийг хүртэл олон төрлийн бэрхшээлтэй тулгарч, хойшилсоор байна. Үүний зэрэгцээ 2027 он гэхэд хотын автобус, трамвай, троллейбуснуудад нийтээр нь парк шинэчлэл хийх амлалтыг эрх баригчид өгчээ. Белградын трамвайн систем 1892 онд анх үүссэн бөгөөд 127 км урттай. Хотыг сүлжсэн уг систем нь Европтоо хамгийн урт сүлжээнд тооцогддог.