Хөвсгөл аймгийн Алаг-Эрдэнэ сумын Хатгал тосгоны ‘Далайн хоолой гэдэг газар мөс цөмөрч, суудлын автомашин живжээ. Энэ тухай дуудлагыг өчигдөр /2024.12.18/ 21.30 цагт онцгой байдлын байгууллагад ирүүлсэн байна. Тус аймгийн Онцгой байдлын газрын 69 дүгээр ангийн алба хаагчдыг очиход 28 настай, эрэгтэй нь “Harrier” загварын суудлын автомашинтай зорчиж яваад мөс цөмөрч живж нас барсан байжээ. Алба хаагчид өчигдөр 22.32 цагт хоолойн эргээс хоёр метрийн гүнээс цогцсыг гаргаж цагдаагийн байгууллагад шилжүүлж өгсөн байна.

Энэ үед ихэнх гол мөрөн, нуурын мөсний зузаан тогтвортой нэмэгдэж байгаа хэдий ч нуурын толио болон голын нийт уртын дагууд мөсний зузаан харилцан адилгүй байдаг байна.

Мөсний даац хүн, мал, машин тэрэг явахад хангалттай хэмжээнд хүрч бэхжээгүй байгаа тул цаг хожих, зам товчлох зэргээр мөсөн дээгүүр явах болон авто тээвэр хийхгүй байхыг мэргэжлийн хүмүүс анхааруулав.