Украины ерөнхийлөгч Володимир Зеленский, НАТО-ийн тэргүүн Марк Рутте болон Европын бусад удирдагч Брюссельд уулзав. Энэ үеэр Зеленский Францын ерөнхийлөгч Эммануэль Макронтой барууны цэргүүдийг Украинд байршуулах талаар хэлэлцлээ. Макрон энэ оны эхээр Украинд хуурай замын цэрэг илгээх санааг анх дэвшүүлсэн. Ингэснээрээ тэр цэрэг илгээх замаар дайныг даамжруулахаас татгалздаг барууны бусад удирдагчаас эрс зөрсөн юм.

Зеленский энэ уулзалтынхаа талаар "Х" платформд жиргэхдээ "Францын ерөнхийлөгчтэй үр дүнтэй уулзалт хийлээ. Бид Оросын түрэмгийллийн эсрэг Украины байр суурийг улам бэхжүүлэхэд чиглэсэн хүчин зүйлсэд төвлөрч, асуудал нэг бүрийг хэлэлцэв. Агаарын довтолгооноос хамгаалах чадавхийг сайжруулахад онцгой анхаарал хандууллаа. Франц улс манай армид зориулж нэг бригад бэлтгэж байгаад талархаж байна. Энэ хамтын ажиллагаагаа үргэлжлүүлж, дахин нэг бригад бэлтгэхээр тохиролцов. Украины бригадыг тоноглоход бусад түнш ч бас хувь нэмрээ оруулж, нэгдэнэ гэдэгт найдаж байна. Найдвартай баталгаа нь энх тайвныг тогтооход зайлшгүй шаардлагатай гэдэг дээр бид санал нэгдэж байна. Украинд энх тайвныг тогтоох замыг тогтворжуулахад хувь нэмрээ оруулах тухай Макроны санаачлага дээр бид үргэлжлүүлэн ажиллав. Энх тайвны төлөө шаардлагатай бүх арга хэмжээг авахын тулд бусад түнштэй харилцах тухайгаа Эммануэль Макрон мэдэгдлээ. Баярлалаа, Франц" гэжээ.

Лхагва гаригт болсон энэ уулзалтын зорилгыг НАТО-ийн тэргүүн Марк Рутте "Оросыг дайнд ялахаас сэргийлэхийн тулд Украиныг хэрэгтэй бүх зүйлээр нь хангах явдал" гэж тодорхойлсон юм.