ОХУ-ын Мурманск мужид Лхагва гаригт суудлын галт тэрэг ачааны галт тэрэгтэй мөргөлджээ. Ослын улмаас хоёр хүн нас барж, дор хаяж 27 хүн бэртэж гэмтэв. 27 хүний 22 нь насанд хүрсэн хүн, тав нь хүүхэд байжээ. Нийт 19 вагон замаасаа гарсны 15 нь ачааны галт тэрэгнийх байсан.

Суудлын галт тэрэг Санкт-Петербургийг чиглэн 326 зорчигчтэй явжээ. Осол болсон Княжая галт тэрэгний буудал нь Москвагаас хойд зүгт 1200 километрийн зайд оршино.

Ослын шалтгаан нь ачааны галт тэрэгний эвдрэлээс болсон байж магадгүй гэж Тасс агентлаг мэдээлжээ. Мөн өөр нэгэн эх сурвалжийн хэлснээр цаг агаар таагүй үе, хүний буруутай үйлдэл болон техникийн гэмтэл хавсарснаас болж осол гарсан гэж таамаглаж байна. Аюулгүй ажиллагааны дүрэм зөрчсөн гэсэн үндэслэлээр эрүүгийн хэрэг үүсгэн ослыг шалгаж эхэлжээ.