Өмнөд Солонгосын 2018 оны орон нутгийн сонгуулиар хууль бусаар ашиг олсон гэх бөөг Мягмар гаригт прокуророос баривчилжээ. 64 настай Жён Жин гэх бөө нь ерөнхийлөгч Юн Сук Ёл болон тэргүүн хатагтай Ким Кён Хи нартай ойр дотно аж. Цэргийн онц байдал зарласнаас болж хэдийнэ хэрэгт орооцолдоод буй Юн бөөгийн асуудлаар дахин дуулиан дэгдээж магадгүй байна.

Виртуал хөрөнгийн гэмт хэргийн хамтарсан мөрдөн байцаах алба Жён Жинийг баривчилж, гэрт нь нэгжлэг хийжээ. Түүний хоёр ухаалаг утсыг прокурор шалгаж байна.

Жён Жин бөөг ерөнхийлөгчийн сонгуулийн кампанит ажлын үеэр хөшигний ард байж, Юны кампанит ажлын багийн де-факто удирдагчийн үүргийг гүйцэтгэсэн гэж таамаглаж байна. Юн Сук Ёлын өрсөлдөгч Ли Жэ Мёны сонгуулийн сурталчилгааны багийн хууль тогтоогчид тухайн үед Юныг бөө мөргөлд автсан гэж буруутгаж, түүнийг дэмжихгүй байхыг сонгогчдод уриалж байжээ.

Харин Ардын хүч нам энэ мэдэгдлийг няцааж буй бөгөөд түүнийг бөө биш гэж мэдэгдэж байна. Жён Жинийг Буддын шашны байгууллагад менежерээр ажиллаж байсан гэж Ардын хүч намаас мэдэгджээ. Гэтэл Буддын шашны байгууллага нь Жён Жинтэй ижил нэр, настай гишүүн байхгүй гэсэн эсрэгцсэн мэдэгдэл хийгээд байна.