Засгийн газрын хуралдаанаас гарсан шийдвэрийг өнөөдөр /2024.12.18/ танилцууллаа.

Тэрбээр, “МУ-ын Засгийн газар 2017 онд орчны бохирдлыг бууруулах үндэсний хороог байгуулж байсан. Тэгвэл Агаар орчны бохирдлыг бууруулах хороог дахин байгуулах чиглэлийг Монгол Улсын Ерөнхийлөгч өгсөн байдаг. Үүний дагуу өнөөдрийн Засгийн газрын хуралдаанаар тус хороог байгуулжээ. Үндэсний хороогоор орчны бохирдлыг бууруулах тэр дундаа онцгойлон агаарын бохирдлыг бууруулахад яаралтай хийх ажлыг төлөвлөнө. Мөн дунд болон урт хугацаанд хийх ажлын төлөвлөгөөг гаргана. Агаарын чанарын талаарх үнэн зөв мэдээллийг иргэдэд өгнө. Ялангуяа сайжруулсан нүүрсний чанар талаар иргэдэд нэгдсэн мэдээлэл албан ёсоор өгнө. Нийслэлд түүхий нүүрсний хоёр асуудал яригдаж байна. Хууль бусаар түүхий нүүрс хэрэглэж буй газруудад захиргааны арга хэмжээ авна. Мөн түүхий нүүрс хэрэглэж байгаа ААН-үүдэд усан халаалтын зуух ашиглах боломжийг эрэлхийлнэ. Авто машины утаа нийслэлийн утааны ихэнх хэсгийг бүрдүүлж байгаа. Нийслэлд явж буй 1100 гаруй тээврийн хэрэгслийн шатахууныг Евро-5 стандартад шилжүүлсэн. Нийслэлд 804 мянган машин зорчиж байна. Дизель түлш маш олон бохирдлыг үүсгэдэг. Уг асуудлыг ОХУ-тай хэлэлцэнэ. Цаашдаа ногоон шилжилтэд оруулах асуудлыг УИХ-аар хэлэлцэнэ. Ялангуяа хиймэл оюун ухаанд суурилсан хяналтыг бий болгоно. Агаарын чанарыг 19 байршилд автомат станцаар хэмжиж байгаа. Үр дүнг Agaar.mn  сайтаар олон нийтэд хүргэж байгаа” гэлээ.

Хууль зүй, дотоод хэргийн сайд О.Алтангэрэл:

-Засгийн газрын өнөөдрийн хуралдаанаар, Хүний эрхтэй холбоотой багц хууль болон жагсаал цуглаан зохион байгуулах, хэвлэлийн эрх чөлөөний тухай хуулийн талаар хэлэлцлээ.

Уг хууль батлагдсанаар сүүлийн жилүүдэд тогтмол ухарч байгаа хүний эрх, эрх чөлөөний индекс урагшлах, Монгол Улсын иргэн хууль тогтоомжийн хүрээнд эрх чөлөөгөө баталгаатай эдлэх боломж бүрдэнэ.

Тухайлбал, Монгол Улсын иргэн жагсаал хийх бол 48 цагийн өмнө мэдэгдэх шаардлагатай. Зөвшөөрөл авсан гэх хариу авах шаардлагагүй. Цагдаа нар иргэдийн аюулгүй байдлыг нь хангаж ажиллана. Нийтийн зам дээр дураараа жагсч болохгүй. Хотын даргын тушаалаар жагсаалыг албадан тараадаг байсан бол нутаг дэвсгэрийнх нь ЗДТГ-аас хууль бус жагсаалыг албадан тараана.

Хүний эрхийн 10 гаруй багц хуульд олон улсын байгууллагын санал зөвлөмжийг тусгаж байсан. Хэвлэлийн эрх чөлөөний тухай хууль анхны хэлэлцүүлгээс маш их өөрчлөгдсөн. Бид өргөн хэлэлцүүлэг хийж, олон улсын хоёр байгууллагатай онлайн хурал хийж, зөвлөмжийг авсан. Анхны хэлэлцүүлгээр шүүмжлэлд өртсөн 90 орчим хувь нь өөрчлөгдсөн. Сэтгүүлч эх сурвалжаа хамгаалах эрхтэй болно. Мөн хэвлэл мэдээллийн хэрэгслийн байгууллагын эзэмшлийг ил тод болгоно. Илт худал мэдээлэл тараах гэдэг зохицуулалтыг нарийвчилж тусгасан.

Шадар сайд С.Амарсайхан:

-Дөрвөн чиглэлээр мэдээлэл өгнө. Нэгдүгээрт, олон нийтийн дунд асуулт хэрэгтэй байгаа Евроазийн эдийн засгийн холбоотой хийх түр хэлэлцээрийн асуудлаар өчигдөр бизнес аж ахуйн нэгж, үйлдвэрлэл эрхлэгчидтэй Эдийн засаг, хөгжлийн яамны ажлын хэсгийн ахлагч нартай хамт уулзаж, ярилцлаа. Өнөөдөр энэ асуудлаар Л.Гантөмөр сайд танилцуулга хийж, энэ хэлэлцээрийн асуудлыг түр хойшлуулах, хэлэлцээрийг цааш нь үргэлжлүүлж үндэсний үйлдвэрлэгч аж ахуйн нэгж байгууллагуудын саналыг нарийвчлан тусгах, нөгөө талаараа экспортлогч аж ахуйн нэгж, үйлдвэрлэгчдийн санал бодлыг сонсох, гадаад зах зээл рүү бараа бүтээгдэхүүнээ экспортлох боломжийг нэмэгдүүлэхийн зэрэгцээ дотооддоо үйлдвэрлэгч аж ахуйн нэгжээ дэмжих, хэрэглэгчдийнхээ хэрэглээг хамгаалах, олон төрлийн бараа бүтээгдэхүүнийг чанартай нийлүүлэх нөхцөл боломжийг нэмэгдүүлэх агуулгаар хэлэлцээрийг цааш үргэлжлүүлж, аж ахуйн нэгжүүдийнхээ саналыг тусган, харилцан ойлголцсон ийм нөхцөлд хийх ёстой гэдэг агуулгаар хэлэлцээр хийх хугацааг хойшлуулахаар шийдвэрлэлээ.

Хоёрдугаарт, УОК, Монгол Улсын Ерөнхийлөгчийн өгсөн үүрэг, чиглэлийн дагуу өвөлжилтийн байдлыг хангах шуурхай бүлэг ажиллаж байна. Бэлтгэл ажлын талаар зарим асуудлыг газар дээр нь шийдвэрлэж, эрсдэлийн үнэлгээ хийж байгаа үүнийгээ танилцууллаа. Нийслэлийн Засаг даргаар ахлуулсан шуурхай штабыг 24 цагаар ажиллуулана. Уг хяналтаар сайжруулсан нүүрсний чанар, аюулгүй байдал, урьдчилан сэргийлэх арга хэмжээ авч, айл өрхүүдэд заавар зөвлөгөө өгч байгаа. Мөн зөвшөөрөлгүй түүхий нүүрс хэрэглэж буй айл өрхөд хяналт тавина. Нөгөө талаар урт хугацаанд хэрэгжих орон сууцуудын төсөл хөтөлбөр зэрэг агаарын бохирдлыг үе шаттай бууруулах арга хэмжээ авах ажлын хэсгийг байгуулна. Энэ хүрээнд С.Одонтуяа сайдаар ахлуулсан Агаар, орчны бохирдол бууруулах үндэсний хороог байгууллаа. УОК болон Шадар сайдын зүгээс үйл ажиллагаанд хяналт тавьж, дэмжлэг үзүүлнэ.

Гуравдугаарт, Монгол Улсын хэмжээнд мах махан бүтээгдэхүүн, малын гаралтай дайвар бүтээгдэхүүнийг боловсруулах, худалдаалах, хэрэглэх техникийн зохицуулалтын шийдвэр 2022 онд Засгийн газрын хуралдаанаас гарсан. Уг ажлын хэрэгжилтийг хангах хүрээнд мах түүхий эдийн захуудад хяналт шалгалт хийж байна. Махны захуудад хийсэн шалгалтаар итгэмжлэлийн хугацаа дууссан асуудал гарсан. Өөрөөр хэлбэл, итгэмжлэлийн баталгаа хийгдэхгүй байгаа мах, махан бүтээгдэхүүн нийлүүлэгдэж байна. Үүн дээр мэргэжлийн байгууллагууд ажиллаж байна.

Дөрөвдүгээрт, Улаанбаатар хотын иргэдэд хоршоологчдын хийсэн бараа бүтээгдэхүүнийг иргэдэд шууд хүргэх ажлыг зохион байгуулж байна гэдгийг хэллээ.