Агаар, орчны бохирдлыг бууруулах үндэсний хороог дахин сэргээж, С.Одонтуяа ахалж, нарийн бичгийн даргаар Х.Нямбаатар ажиллахаар болжээ. Өмнө нь Эрчим хүчний сайд Б.Чойжилсүрэн 2023 оны хоёрдугаар сарын 1-нээс Орчны бохирдлыг бууруулах үндэсний хороог даргалж байсан.

Тодруулбал, Засгийн газрын 2023 оны хоёрдугаар сарын 1-ний өдрийн 38 дугаар тогтоолоор Орчны бохирдлыг бууруулах үндэсний хорооны бүрэлдэхүүнийг шинэчлэн баталсан. Үндэсний хороо нь 21 хүний бүрэлдэхүүнтэй, зургаан сайд, дөрвөн дэд сайд, нийслэлийн Засаг дарга, дөрвөн ахлах зөвлөх, зургаан газар нэгжийн даргаас бүрдэж байв.

Энэ талаар хотын дарга мэдээлэл өгөхдөө "Агаар дахь азотын давхар исэл, нүүрстөрөгчийн хувь хэмжээг бууруулах, урт болон богино, дунд хугацааны төлөвлөгөөг гаргаж ажиллах чиг үүрэг бүхий Үндэсний хороог өнөөдөр /2024.12.18/ Засгийн газрын хуралдаанаар байгууллаа. Энэ хороог албан тушаалын дагуу Байгаль орчин, уур амьсгалын өөрчлөлтийн сайд С.Одонтуяа ахалж, миний бие нарийн бичгийн даргаар ажиллана" гэв.

Засгийн газрын хуралдаанаар 2023 оны арваннэгдүгээр сард Орчны бохирдлыг бууруулах үндэсний хороог татан буулгах шийдвэрийг гаргасан. Тус хороонд 25.6 тэрбум төгрөг төгрөг төсөвлөсөн байсан бөгөөд татан буулгасан учраас энэ төсвөөс 350 сая төгрөгийг Байгаль орчин аялал, жуулчлалын сайдын багцад үлдээгээд 25.3 тэрбум төгрөгийг нийслэлийн төсөвт шилжүүлж байсныг албаныхан мэдээлж байсан юм.