Башар аль-Ассадын дэглэм нуран унасны дараа сайн дурын Цагаан дуулга бүлэг Сайднаяа шорон болон бусад хорих төвд хоригдож байсан хүмүүсийг сулласан байдаг. Мөн уг ажиллагаанд хоригдогсдын ар гэр, төрөл төрлөгсөд оролцсон билээ. Зарим хүмүүс олон жил хоригдож, сураг ажиг тасарсан нэгнээ олсондоо баяртай байсан бол одоог хүртэл олдоогүй хүмүүсийн гэр бүл эрэн хайх ажиллагааг үргэлжлүүлж байна. Цагаан дуулга болон босогчдын удирдлага тухайн олдоогүй хүмүүст юу болсон талаар олж мэдэх гэж хичээж буй. Үүнтэй зэрэгцэн, Дамаск хотын ойролцоо олон тооны булш олдож, Ассадын дарангуйлал ямар аймшигтай, хүний эрхийг зөрчдөг байсныг дахин батлав. Тодруулбал, хотоос зүүн зүгт байрлах Кутайфад үй олноор нь булшилсан гэдгийг батлах 100 гаруй цогцос, араг яс олджээ.

Тухайн оршуулгын газрыг илрүүлсэн хүмүүсийн олж мэдсэнээр, 2012-2018 оны хооронд чиргүүлтэй тракторууд долоо хоногт хоёр удаа ирж, 150 гаруй цогцсыг гүн жалганд хаядаг байжээ.

Үүний дараа тагнуулын ажилтнууд цогцсыг бульдозероор дарж, булдаг байв. Мөн Израа хотын хойд хэсэгт орших газраас 20 цогцсыг нэг дор булсан байхыг олжээ. Сураггүй алга болсон хүмүүсийн олон улсын комисс (ICMP) мэдээлснээр, Сирийн 150 мянга орчим хүн сураггүй алга болсон гэж бүртгэгдсэн бөгөөд дийлэнх нь Ассадын дэглэмийн үед саатуулагдсан хүмүүс аж. Өмнө нь булш ухагчаар ажиллаж байсан хүн үй олноор нь булшилсан газруудын талаар мэдээлэл өгчээ. Тэрбээр 2020 онд эрүү шүүлтийн шинж тэмдэгтэй 100 гаруй цогцсыг булсныхаа дараа булш ухагчаар ажиллахаа больсон аж. Одоогийн байдлаар, нэг дор хэдэн зуугаар нь булшилсан гэх найман оршуулгын газар мэдэгдэж байгаа ч илрээгүй байх боломжтой оршуулгын газрын тоо хэдэн мянгад хүрнэ гэж таамаглаж байна.

Олдсон цогцсуудыг таних аргагүй болсон тул тус бүрийг нь цифрээр нэрлээд буй. Тиймээс цогцос таних шинжээчдийг эрэн хайх, таних ажиллагаанд хамтрахыг сайн дурын бүлэг уриалаад буй.

Сураггүй болсон хүмүүсийн гэр бүл хариулт хайсаар байна. Жишээлбэл, авга ах, төрсөн дүүгээ Ассадын шоронд орсон гэдгийг мэдэх Хазем Дикел тэдэнд юу тохиолдсоныг мэдэхийг хүсч байна. Түүний хэлснээр, авга ах болон дүү нь эхэндээ холбоо барьж байсан ч эрүүдэн шүүлтийн улмаас сураг тасарчээ. Тэрбээр Сайднаяа шоронгоос эрэн хайсан ч олдоогүй учир ядаж цогцсыг нь олоод хүндэтгэлтэйгээр оршуулах хүсэлтэй байгаа аж.