ОХУ-ын парламентын доод танхим Талибаны хөдөлгөөнийг террорист бүлэглэлийн жагсаалтаас хасах хуулийн төслийг Мягмар гаригт баталлаа. Төрийн думын хоёр, гурав дахь хэлэлцүүлгээр баталсан хуулийн төслийн дагуу аливаа байгууллагыг албан ёсоор террорист гэж үзэхийг шүүх түдгэлзүүлж болно. Дараагийн шатанд дээд танхим баталж, Путин гарын үсэг зурснаар хууль хүчин төгөлдөр болно.

ОХУ 2003 онд Талибаны хүчнийг террорист байгууллагын жагсаалтад оруулсан. Гэсэн хэдий ч Талибаны төлөөлөгчид Москвагийн зохион байгуулсан янз бүрийн форумд хэдэнтээ оролцжээ.

Афганистаныг тогтворжуулахад талибуудыг татан оролцуулах шаардлагатай гэж Оросын эрх баригчид онцолдог аж. ЗХУ нь Афганистанд 10 жил үргэлжилсэн дайн хийсний эцэст 1989 онд цэргээ эргүүлэн татсан. Тэр цагаас хойш ОХУ Афганистаны асуудлаарх яриа хэлэлцээг зохион байгуулж, дипломат харилцаагаа эхлүүлжээ. Энэхүү яриа хэлэлцээнүүдэд талибууд болон хөрш орны төлөөлөгчид оролцдог.

Талибууд Афганистаны засгийн эрхэнд гарснаас хойш гурван жил өнгөрч байна. Энэ хугацаанд тэд гадаад, дотоодын эсэргүүцэлтэй бараг тулгараагүй бөгөөд тэдэнтэй хэрхэн харьцах талаар олон улсын хамтын нийгэмлэгийн санал зөрөлдөөн үргэлжилсээр байна.