Нийслэлийн Баянзүрх дүүргийн 2 дугаар хороонд өчигдөр /2024.12.17/ орой 23.30 цагийн орчимд агааржуулалтын хоолой шатаж дөрвөн иргэн угаартжээ. Тодруулбал, орон сууцны хорооллын нэгдүгээр давхарт агааржуулалтын хоолой шатаж, их хэмжээний утаа гарч, улмаар 11, 12 дугаар давхарт хуралдсан байжээ. Иргэдийн дуудлагын дагуу нийслэлийн Чингэлтэй дүүргийн Онцгой байдлын хэлтсийн 10 дугаар ангийн алба хаагчид агаарыг сэлгэн, ажиллаж унтраажээ.

Их хэмжээний утаа гарсны улмаас тухайн байрны 12 дугаар давхрын оршин суугч хоёр иргэн, нэг бага насны хүүхэд, мөн хаяг тодорхойгүй 16 настай эрэгтэй нар угаартсан байсныг Нийслэлийн яаралтай түргэн тусламжийн төвийн эмчид хүлээлгэн өгсөн байна. Түүнчлэн Онцгой байдлын алба хаагчид утаажилтын бүсээс нийт 45 иргэнийг гаргасан гэж мэдээллээ.

Аюулт үзэгдэл, ослын тохиолдол 2024 оны эхний 11 сарын байдлаар 4910 удаа бүртгэгдэж, өмнөх оны мөн үеэс 23.8 хувиар өсчээ. Тохиолдсон аюулт үзэгдэл, осолд 2024 оны эхний 11 сарын байдлаар нийт 6062 хүн нэрвэгдсэн байна.