"Хурд" хамтлагийнхан 30 жилийн ойдоо зориулан бүтээсэн "Бүсгүй" уран сайхны кино 2025 оны нэгдүгээр сарын 16-наас нээлтээ хийх гэнэ. Удахгүй нээлтээ хийх киноны гол дүр болох Мөнхгэрэлийн дүрд жүжигчин Гансүхийн Ариунболор тогложээ.  Тэрбээр “Хохирогч” олон ангит киноны гол дүрээрээ олонд танигдсан гэж хэлж болно. Анх 2013 онд “Дурлалын гэмт хэрэг” киноны гол дүрд тоглож байжээ.

Жүжигчин бүсгүй 10 настайгаасаа эхлэн ХБНГУ-д амьдарсан бөгөөд тус улсын иргэншилтэй бөгөөд Германы алдарт бүжигчин, бүжиг дэглээч Дефлет Соостын зарласан уралдаанд оролцон түрүүлж, түүнээс хойш тэр хүний бүжгийн компанид харьяалагдах болжээ. Мөн тэрбээр 17 настайдаа Герман улсад зохион байгуулдаг “Азийн мисс” уралдаанд оролцож, түрүүлж байжээ.

Г.Ариунболор өдгөө Германы кино урлагийн зах зээлд Ариaна Гансүх нэрээр ажилладаг гэнэ.

Берлиний кино драмын сургуульд кино жүжигчний чиглэлээр үргэлжлүүлэн суралцсан тэрбээр "Франкфуртын хувь тавилан” гэх кинонд тоглож, Германы А зэрэглэлийн Мюнхений олон улсын кино наадамд "Шилдэг залуу жүжигчин"-ээр шалгарч байжээ. Жүжигчин бүсгүй одоо Австрийн  “Agentur Nielsen” гэх агентлагт харьяалагддаг аж.

"Хурд" хамтлагийн 30 жилийн ой энэ жил тохиож, ойн баярын тоглолтоо 2023 оны зургадугаар сарын 10-нд Төв цэнгэлдэх хүрээлэнд “Хурд-30 жил" нэртэйгээр хийсэн. Тухайн үед хамтлагийн уран бүтээлчид "Энэ жил шинэ мюзикль хийж, "Бүсгүй" дуунаас сэдэвлэсэн бүрэн хэмжээний уран сайхны кино хийхээр төлөвлөж байгаа" гэдгээ онцолж байсан юм.