ОХУ-ын төрийн өмчит "Сбербанк"-ийн салбарыг Украины өмнөд хэсэг дэх эзлэгдсэн Херсон, Запорожье мужуудад нээжээ. Банкны хэвлэлийн албанаас мэдээлснээр энэхүү салбар нь бүх төрлийн үйлчилгээг бүрэн үзүүлнэ.

Шинэ салбарууд Херсон мужийн Геническ хот болон Запорожье мужийн Мелитополь хотуудад нээгдсэн. Өмнө нь Луганск, Донецк мужуудад хэдийнэ салбар нээгдсэн байсан. Луганск, Донецк дахь үйл ажиллагаа нь харьцангуй өргөн цар хүрээтэй аж. Тодруулбал, Донецк хотод дөрвөн салбар, Луганск хотод таван салбар үйл ажиллагаа явуулж байна.

Украины дөрвөн бүс нутгийг ОХУ-д нэгтгэж буйгаа Путин 2022 онд зарласан. Улмаар энэ оны нэгдүгээр сард Оросын банкуудыг Украины эзлэгдсэн бүс нутгуудад өргөжүүлэх ажлыг илүү идэвхжүүлнэ гэж мэдэгдсэн юм. "Сбербанк"-аас өмнө төрийн өмчит "Промсвязьбанк" эдгээр бүс нутагт үйл ажиллагаагаа явуулаад эхэлсэн байжээ.

Дайны эхэн үед Оросын компаниудад хориг арга хэмжээ авахад "Сбербанк" тэдний тоонд багтсан. Ингэснээр "Сбербанк" Европын зах зээлээс бүрмөсөн гарчээ.