Чечениэс Сирид улаан буудай нийлүүлэхэд бэлэн гэж удирдагч Рамзан Кадыров мэдэгджээ. Учир нь Сирийн шинэ засгийн газар тодорхойгүй байгаа тул Кремлиэс нийлүүлэлтийг түр зогсоогоод байгаа аж. Үүнээс гадна Сири рүү улаан буудай тээвэрлэж явсан Оросын хоёр хөлөг онгоц зорьсон газраа хүрч чадалгүй чиглэлээ өөрчилсөн гэх мэдээлэл байна.

Кадыров Ням гаригт телеграмдаа мэдээлэл хийхдээ "Чиглэлээ өөрчилсөн хоёр хөлөг онгоц арилжааны улаан буудай тээвэрлэж явсан. Гэхдээ энэ нь ОХУ-ын төрийн дэмжлэгтэйгээр Сирид нийлүүлж буй нийлүүлэлтэд нөлөөлөөгүй. Боломжгүй, итгэмээргүй ч гэлээ би Чеченийн тэргүүний хувьд хариуцлага хүлээж, Сирид шаардлагатай хэмжээний улаан буудайг нийлүүлэхэд бэлэн" гэжээ. Гэхдээ нийлүүлэлтийг хэрхэн зохион байгуулах, санхүүжүүлэх зэрэг мэдээллийг тэр тодорхой дурдаагүй. Шаардлагатай бол талийгаач эцгийнхээ нэрэмжит буяны сангаар дамжуулан Сирид хүмүүнлэгийн тусламж үзүүлнэ гэж болно гэж Кадыров хэлжээ.

ОХУ бол улаан буудайн экспортоор дэлхийд тэргүүлэгч. Хоёр орны эсрэг тавьсан барууны хориг арга хэмжээг тойрон санхүү, ложистикийн нарийн төвөгтэй зохицуулалтаар Оросоос Сирид улаан буудай нийлүүлдэг.

Энэ улиралд Оросоос Сирид 300 мянган тонн улаан буудай экспортолсон гэж тооцоолж байна. Мөн Сири улс Оросын улаан буудайг худалдан авагчдын 24 дүгээрт жагсч байна. Сирийн нийт импортын хэмжээг хоёр сая орчим гэж тооцоолж байна. Өдгөө нийлүүлэлт тасалдсан нь 23 сая гаруй хүн амтай Сирид өлсгөлөнгийн аюулыг авчирч болзошгүй юм.