СТАТИСТИК: 8 жилд 644 хүн угаартаж, амиа алдав

Аюулын харанга дэлдсэн үхлийн хотод сүүлийн найман жилийн хугацаанд 644 хүн угаартаж амиа алджээ. Утаагүй хот болгоно гэж нэвтрүүлсэн сайжруулсан түлшний уршгаар бид унтаад сэрэхгүй ч байж мэдэх эрсдэл дунд амьдарч байна.

Угаарын хийд хордсон тохиолдлын тоо 2018 оноос хойш гэрлийн хурдаар өсч, өдөрт багадаа 10 хүн угаартаж, эмнэлгийн тусламж авч байна. 2023 оны байдлаар нийт 3184 иргэн угаартсан бол, 2024 оны арваннэгдүгээр сарын байдлаар 2531 иргэн угаарын хийд хордсон гэдгийг албаныхан хэлж байна. Гэвч энэ тоо бодит үнэнээс зөрүүтэй байж болохыг тунгаан бодно биз ээ.

SOS: 2024 он гарснаар нийт 41 иргэн угаартаж, харамсалтайгаар амиа алдлаа.

Энэ мэт угаартаж амиа алдсан иргэдийн талаар үй олон мэдээ цацагдлаа.

Хариуцлагагүй иргэдийн буруу гэж ярьдаг төр цаашдаа хэчнээн гэр бүлд хагацал үзүүлэх вэ?

БАГА НАСНЫ ХҮҮХДҮҮД УУШГИНЫ ХАТГАЛГААГААР НАС БАРЖ БАЙНА !

Монгол Улсад амьсгалын замын өвчний шалтгаант нас баралт буурахгүй байна. Тодруулбал, жил бүр нас баралтын тэргүүлэх таван шалтгааны нэгт тооцогдсоор байгаа юм. Утааны улиралтай зэрэгцэн томуу, томуу төст өвчний өвчлөл нэмэгддэг. Энэ долоо хоногт гэхэд 9788 томуугийн тохиодол илэрчээ.

Вирус судлалын тандалтаар томуугийн өвчлөлийн 67.6 хувьд нь амьсгалын замын синцитиаль вирус илэрсэн байна.

Хамгийн харамсалтай нь нийт өвчлөгсдийн 80.5 хувийг 0-15 насныхан эзэлжээ. Үүний 44.7 хувь нь 0-5 насны хүүхдүүд байгаа юм.

Учир нь бага насны хүүхдүүдийн дунд өвчлөл хүндрэх эрсдэлтэй бөгөөд уушгины хатгаагаар нас барах тохиодол нэмэгдэж байна.

2024 оны арваннэгдүгээр сарын байдлаар 783 хүн амьсгалын замын өвчний шалтгаанаар нас баржээ. Энэ тоо дахиад ч нэмэгдэнэ. Учир нь бидний амьсгалж буй утаа, цаашид амьдрах өдрийн тоог хэмжиж байна. Бид утаанд дарлуулж, угаарт хордож олон иргэнээ алдлаа. Гэвч өнөөдрийг хүртэл хэн ч үүнд гэмшсэнгүй. Уй гашуу нь арилаагүй иргэдээсээ уучлал болтугай гуйсангүй..