Өмнөд Солонгосын ерөнхийлөгч Юн Сук Ёл цэргийн онц байдал зарласантай холбоотойгоор түүнд прокурорын дэргэдэх мөрдөн байцаах хэсгийнхэн Ням гаригт зарлан дуудах хуудас явуулжээ. Гэвч тэр тушаалыг биелүүлээгүй бөгөөд учир шалтгаан нь тодорхойгүй байна. Иймд өнөөдөр /2024.12.16/ дахин зарлан дуудах хуудас илгээхээр төлөвлөжээ.

Түүнийг дотоодод бослого өдүүлсэн, эрх мэдлээ урвуулан ашигласан хэрэгт сэжиглэн байцаахаар ийн зарлан дуудах хуудас илгээгээд буй. Хэрвээ хоёр дахь дуудлагыг тэр дахин үл тоомсорловол баривчлагдаж ч магадгүй юм. Эрүүгийн хуулийн дагуу гэмт хэрэг үйлдсэн гэж үзэх үндэслэл бүхий сэжигтэн хүндэтгэн үзэх шалтгаангүйгээр тушаалыг биелүүлээгүй тохиолдолд прокуророос баривчлах захирамж гаргаж болно.

Юн Сук Ёл өнгөрсөн Пүрэв гаригт ард түмэндээ хандан мэдэгдэл хийхдээ аливаа импичмент, мөрдөн байцаалтын ажиллагаатай шууд тэмцэнэ гэжээ.

Дашрамд дурдахад, Өмнөд Солонгосын Үндэсний ассамблей өнгөрсөн Бямба гаригт Юн Сук Ёлын импичментийг баталсан. Одоо Үндсэн хуулийн цэц 180 хоногийн дотор Юныг огцруулах эсэхийг шийднэ.