Муу л бол захын хар хойд овоохой гэгчээр нийслэлийн агаарын бохирдлын буруутнаар гэр хорооллынхныг нэрлэдэг болсоор хэдэн ч жил болов.

Уг нь анх сайжруулсан түлш хэрэглээнд нэвтрүүлсэн үеэс л гэр хорооллын иргэд “Шахмал түлш муухай үнэртэйгээс гадна илч алга. Утаа ч буурсангүй” гэдгийг анхааруулсан. Гэвч эл асуудлыг хариуцдаг албан тушаалтнууд “Иргэд түүхий нүүрс түлж, агаар орчин бохирдуулж байна” гэж бухаж ирсэн.

Одоо ч Улаанбаатар хотын агаарын бохирдолд гэр хорооллынхон буруутай болж таарч байна.

Учир юу вэ гэвэл Шадар сайд С.Амарсайханы тушаалаар өнгөрсөн хугацаанд холбогдох  мэргэжлийн байгууллагууд агаарын бохирдлын талаар шалгалт хийхэд хэд, хэдэн зөрчил илэрсэн нь гэр хороолынхонтой холбоотой болж таарав.

Тодруулбал, дээрх шалгалтаар гэр хорооллын зарим айл өрхүүд түүхий нүүрс, резин, хуучирч муудсан хувцсанд автомашины тос найруулж шатаах зэргээр бусад хаягдал хог, зориулалтын бус түлш түлж байсан аж. Мөн зарим авто засварын газрууд хуучин дугуй, автомашины хаягдал тос масло, слярки  шатааж байсан бол бага оврын уурын зуухтай аж ахуйн нэгжүүд уурын зуухандаа шүүлтүүр тавилгүй галлах зэрэг зөрчлүүд илэрсэн юм байна.

Уг нь гэр хорооллынхон нэг үеэ бодвол түүхий нүүрс хэрэглэвэл торгуулна, агаар орчин бохирдуулсан хэрэгт татагдана гэдгээ мэддэг болсон учир сайжруулсан түлш л авч хэрэглэдэг. Хэдийгээр үнэр ихтэй, илч багатай ч өөр сонголт үгүй тул төр засгийнхаа шийдвэрийг дагахаас арга алга гээд олон жил хэрэглэж буй.

Нийслэлийн гэр хороололд 220 мянга гаруй өрх айл амьдарч буй. Тэднээс нэг, хоёр зэргийн айл нь түүхий нүүрс түлсэн байхыг үгүйсгэхгүй. Гэвч тэрхүү утаа нь нийслэлийн агаарыг тэр чигт нь бохирдуулна гэж юу байх вэ дээ.

Ийм үлгэрт итгэх хүн ч ховор болсон. Хэрэглэж байгаа сайжруулсан түлш асуудалтай болоод л тэр.

Одоо эрхтэн дархтанууд агаарын бохирдлыг ард иргэд рүү чихэж суухынхаа оронд тал талаасаа зүтгээд аль болох эрчим хүч, дулааны эх үүсвэрээ нэмэгдүүлж, гэр хорооллоо барилгажуулж агаарын бохирдлыг бууруулахад хүчин чармайлтаа тавь. “Бүхнийг фронтод гэдэг шиг агаарын бохирдлыг бууруулах чиглэлээр төсөв хөрөнгөө зарцуул”. Тэгэхгүй бол нийслэлийнхэн тэр чигээрээ уушигны асуудалтай болцгоож байна.

Ер нь бол дүүжин тээвэр, Богдхан уулыг нүхэлж туннель барих, метротой болох зэргээс урьтаж хийх аминд тулсан асуудал бол агаарын бохирдолтой хийх тэмцэл болсон шүү.

Г.ХОРОЛ