АНУ-ын ерөнхийлөгчийн сонгуульд Дональд Трамп ялалт байгуулснаас хойш криптовалютын ханш 50 гаруй хувиар өссөн. Тэр дундаа биткойны ханш шинэ дээд амжилт тогтоогоод байна. Тодруулбал, дэлхийн хамгийн том криптовалютын ханш богино хугацаанд 106 мянган ам.доллар давжээ. Өнөө өглөөний байдлаар биткойны Азийн арилжааны ханш 105 мянга гаруй ам.доллар байна.

Трампийн засаг захиргааг Байдены үеийнхтэй харьцуулахад криптовалютуудад илүү ээлтэй байна гэж таамаглаж байна. Тэрбээр өнгөрсөн Пүрэв гаригт мэдэгдэл хийхдээ “Газрын тосны стратегийн нөөцийн нэгэн адил дижитал мөнгөн тэмдэгтийн үндэсний нөөцийг бий болгох талаар бодож байна” гэжээ.

Цахиурын хөндийн бизнес эрхлэгч Дэвид Саксыг хиймэл оюун ухаан болон криптовалютын хаан гэж Дональд Трамп нэрийдээд буй. Дэвид Сакс нь “PayPal”-ын гүйцэтгэх захирал асан бөгөөд Трампийн зөвлөх, мега донор Элон Маскийн дотны найз юм.

Түүнчлэн криптовалютыг дэмжигч бөгөөд Вашингтоны өмгөөлөгч Пол Аткинсыг Үнэт цаас, биржийн комиссын шинэ тэргүүнээр нэр дэвшүүлнэ гэдгээ Трамп мэдэгдээд байна. Одоогийн тэргүүн Гэри Генслер шинэ ерөнхийлөгчийн тангараг өргөх өдөр албан тушаалаасаа огцорно гэдгээ мэдэгджээ. Гэри Генслэр криптовалютын фирмүүдийн эсрэг хууль ёсны арга хэмжээ авсан нь Трампад таалагдаагүй. Иймд Трамп ажлаа хүлээж авсан эхний өдрөө л түүнийг хална гэж төлөвлөж буйгаа өмнө нь мэдэгдэж, багагүй маргаан дэгдээж байжээ.