Нийслэлийн томоохон төслийн талаар Гавьяат эдийн засагч Б.Осоргарав өнөөдөр /2024.12.16/ байр сууриа илэрхийллээ.

Тэрбээр "Би Ерөнхий сайд Л.Оюун-Эрдэнэ болон Засгийн газрын сайд, УИХ-ын гишүүд, хотын дарга Х.Нямбаатар нарт гурван  асуудлыг тавьж, нийт ард иргэд дунд хэлэлцүүлэг өрнүүлэх уриалгыг гаргаж байна. Нэгдүгээрт, Дархан цаазат Богд уулаа нүхлэхийн тулд их хэмжээний өр зээл тавьж, 1.4 тэрбум ам.доллар үрэх нь зөв үү. Монгол Улс өргөн уудам нутагтай орон. Газар нутаггүй улс шиг дархан цаазат уулаа нүхэлж, мөнгө үрэх зайлшгүй шаардлага байна уу. Үүний оронд Налайхын замыг дахин өргөтгөж, нэг талдаа 3-4 эгнээтэй болгож, Богд уулынхаа зүүн өвөрт очуулбал яасан юм бэ. Тэр их өр зээлийнхээ үлдсэн мөнгөөрөө Богд уулынхаа өвөрт ус, дулаан, дэд бүтцийг нь шийдэж, үйлдвэр үйлчилгээний газар барьвал нэг хэсэг хүн ам, амьдрах юм биш үү. Ингэж сэтгэлийн хөөрлөөр асуудлыг шийдэх нь хэр оновчтой вэ.

Хоёрт, Богд уулын баруун талаар асар их өр зээлээр тавьсан хурдны засмал замаар "Чингис хаан" олон улсын нисэх буудал руу очиж байна. Энэ их өр зээлээр нэг талдаа 3-4 эгнээтэй замыг Богд уулынхаа зүүн, баруун талаар тавьж, 20 минутын хот байгуулбал яасан юм бэ.

Дархан цаазат Богд уулаа нүхлэх эсэх асуудлаар УИХ дээр сонсгол явуулъя. Гуравт, тэр их өр зээлийн мөнгөөрөө одоо ТЭЗҮ хийж байгаа Шинэ Хархорум хот руу хурдны галт тэргийн зам барих нь илүү ашигтай. Энэ нь ирээдүйн үр ашигтай шийдвэр биш үү. Дөрөвт, Туул голын эрэгт ямар ч төлөвлөлтгүй авоигын том хаус, өндөр орон сууц барьчихсан шүү дээ. Яаж голын эрэг дагуу хурдны авто зам тавих юм бэ. Үүний оронд баруун тийш Баянцогт сум байршиж байсан газар руу авто зам дагуу хот байгуулах хэрэгтэй. Ерөнхий сайд Л.Оюун-Эрдэнэ тэргүүтэй хамтарсан Засгийн газрын мега төслүүдийг ард иргэд дэмжиж байгаа. Хамгийн гол нь үр ашигтай, ажлын байр бий болгох ёстой. Монгол Улсын нийт ард түмэн дундаа нээлттэй хэлэлцүүлэг өрнүүлж, санал бодлыг нь сонсох хэрэгтэй. Улсынхаа энэ их өрийг бидний үр хойч хэрхэн төлж барах вэ. Эмгэнэлт явдал болох вий. Эх орны газар нутгаасаа тасдаж, өр зээлээ төлөх үү" гэв.