Монгол Улсын өр 2017 оноос хойш тасралтгүй өсчээ. Монгол Улсын нийт гадаад өрийн хэмжээ 2023 оны хагас жилийн байдлаар 33.8 тэрбум ам.доллартай тэнцэж байв. Үүний найман тэрбум ам.долларыг Засгийн газрын гадаад өр, хоёр тэрбумыг Монголбанкны өр эзэлжээ. Мөн төрийн өмчит компаниудын гадаад болон дотоод өр 10 гаруй их наяд төгрөгөөр хэмжигдэж байсан юм.

Гэтэл 2024 оны байдлаар Монгол Улсын нийт гадаад өр 35.6 тэрбум ам.доллар болж, өмнөх оны мөн үеэс 7.2 хувиар өссөн гэдгийг Үндэсний статистикийн хорооноос мэдээллээ. Гадаад өрийн өсөлтөд шууд хөрөнгө оруулалт, компани хоорондын зээл 16.6 хувиар өссөн нь голлон нөлөөлсөн байна.

Харин Засгийн газрын гадаад өр 2024 оны эхний есөн сарын байдлаар  4.5 хувиар өсчээ.

Түүнчлэн Засгийн газрын өрийн үндсэн төлбөрт 1.7 их наяд төгрөг, хүүгийн төлбөрт нэг их наяд төгрөг төлсөн байна. Засгийн газрын өрийн дотоодын нийт бүтээгдэхүүнд эзлэх хувь 2025 онд 55 хувь, 2026 онд 50 хувьтай тэнцэх тооцоолол гарсан байна.