НЭМЭЛТ:

Хоёр багийн шийдвэрлэх тоглолт "dust2" мап дээр болсон. Тоглолтын эхнээс "donk" буюу Данил Крышковец гайхалтай буудалтуудыг толилуулж, багаа манлайллаа. Эхний хагаст "Spirit" бүрэн илүүрхэж, хоёрдугаар хагаст "FaZe" раундын зөрүүг ойртуулж эхэлсэн ч төгсгөж чадсангүй.

Сэтгэл хөдлөлөө ил гаргадаг, дуу, шуутай "donk" гранд финалд бүрэн төвлөрсөн нь харагдаж, илүү үйлдэл гаргасангүй. Тоглолт 13-10 гэсэн харьцаатай өндөрлөлөө.

Ийнхүү Оросын "Spirit" баг анх удаагаа Мэйжорын аварга болж, түүхэнд нэрээ үлдээлээ. Мөн "Spirit" нь "dota2"-ийн "The International" болон "CS2"-ийн Мэйжорт түрүүлсэн хоёр дахь байгууллага болов. Тэднээс өмнө Украины "NaVi" энэ амжилтыг үзүүлж байжээ.

Хоёр багийн тоглолт 1-1 гэсэн харьцаатай тэнцэж, шийдвэрлэх гурав дахь тоглолт "dust2" дээр болохоор боллоо. "Spirit"-ээс "donk", "FaZe"-ээс "ropz" нар гайхалтай тоглож, багаа манлайлав. Мэйжорын аварга тодроход ердөө ганцхан мап үлдлээ.

Шанхайн Мэйжорын урт удаан аялал ийнхүү эцсийн бүлэгтээ ирлээ. Өнөөдөр/2024.12.15/ 17:00 цагаас аваргын төлөөх гранд финалын тоглолт АНУ-д төвтэй, Европд үүрээ зассан "FaZe" болон Сербид төвтэй Оросын "Spirit" багуудын хооронд болно.

17 настай Данил Крышковец буюу "donk" энэ удаагийн Шанхайн Мэйжорын гол дүр болоод буй. Түүнийг харах гэж, дэмжих гэж Хятадын өнцөг булан бүрээс цахим спорт сонирхогчид цуглаж, буудлынх нь гадаа хонон, өнжин хүлээж байгаа гэх. Гоц авьяастан хүүгийн баг таамаг ёсоор финалд хүрлээ. Одоо тэдэнд ганцхан даваа үлдсэн.

Тэгвэл нөгөө талд хашир туршлагатай тоглогчдоос бүрдсэн "FaZe" бий. Тэдний плей-оффын зам амар байсангүй. "Vitality", "G2" гээд дэлхийн чансааг тэргүүлэгчдийг толгой дараалан "буудаж" энд хүрчээ. Энэ плей-оффд Робин Куль буюу "ropz" гайхалтай байгаа. Ёстой л зүүднээсээ сэрсэн мэт тоглолтыг үзүүлж, багаа манлайлж байна.

Ийнхүү гранд финалын тоглолт эхэллээ. "FaZe"-ийн гайхалтай ялалтын буухиа үргэлжлэх үү, эсвэл "donk" хүү ах нарынхаа хамтаар анхны Мэйжортоо түрүүлэх үү?