Сирийн ерөнхийлөгч Башар аль-Ассадын дэглэм нуран унаснаар босогчид түр засгийн газар шинээр байгуулаад буй. Уг засгийн газрыг тэргүүлж буй Хаят Тахрир аль-Шам бүлэглэлийн удирдагч Абу Мохаммед аль-Голани Бямба гаригт мэдэгдэл хийхдээ "Ассадын дэглэмийг дэмждэг байсан Орос, Ирантай харилцаагаа эргэн харна. Түр засгийн газар Оросын асуудалд одоохондоо болгоомжтой хандана" гэжээ.

Оросууд Сири дэх баазаасаа цэрэг болон хөрөнгөө эргүүлэн татаж эхэлсэн гэх мэдээлэл цацагдсан. Сирийн нөхцөл байдалд ОХУ хэрхэн хариу үйлдэл үзүүлэх бол гэж олон улс тэднийг ажиглаж байна.

Энэ хооронд АНУ-ын Төрийн нарийн бичгийн дарга Энтони Блинкен Турк болон холбогдох бусад орны Гадаад хэргийн сайд нартай уулзаж, Сирийн нөхцөл байдлын талаар ярилцав. АНУ Хаят Тахрир аш-Шам бүлэглэлийг террорист байгууллага гэж зарлаад байсан билээ. Өдгөө тус бүлэглэлийн тэргүүлсэн засгийн газартай хэрхэн харилцахаа АНУ нухацтай авч үзэж байна.

Үүний зэрэгцээ Израилийн арми Сирид удаа дараа агаараас цохилт өгч байна. Тодруулбал, Баасан гаригаас Бямба гаригт шилжих шөнө Сирид 28 удаа агаараас довтлов. Үүнийгээ тэд Ассадын дэглэмд хадгалагдаж байсан зэвсгийн нөөц террористуудын гарт орохоос сэргийлж буй үйлдэл гэсэн юм.