Юн Сук Ёлын импичментийг зарласны дараа Өмнөд Солонгосын ерөнхий сайд Хан Дак Сү ерөнхийлөгчийн үүрэг гүйцэтгэгчээр шууд ажиллаж эхэлсэн. Тэрбээр ажил үүргээ хүлээж авмагцаа өнөөдөр /2024.12.15/ АНУ-ын ерөнхийлөгч Жо Байдентай утсаар ярьжээ. Ийн ярихдаа хоёр орны харилцааг хадгалж, хөгжүүлэхээ амласан байна. Мөн Хойд Солонгосоос учирч буй цөмийн аюул, Москва, Пёньяны хамтын ажиллагаа гүнзгийрэх зэрэг нийтлэг сорилтуудын өмнө батлан ​​хамгаалах байр сууриа бэхжүүлнэ гэдгийг онцлов.

Жо Байден хариуд нь Өмнөд Солонгосын ардчилалд итгэлтэй байгаагаа илэрхийлээд, ардчилал тэсвэр хатуужилтай байгааг ч онцолсон байна. Тэрбээр "Өмнөд Солонгос, АНУ-ын эвсэл өөрчлөгдөөгүй хэвээр. Өмнөд Солонгос – АНУ болон Өмнөд Солонгос – АНУ – Японы хамтын ажиллагааг хөгжүүлэх, бэхжүүлэхийн төлөө цаашид үргэлжлүүлэн хамтран ажиллах болно" гэжээ.

Хан Дак Сү, Жо Байден нар 16 минутын турш утсаар ярьжээ.

Эргэн сануулахад, Өмнөд Солонгосын Үндэсний Ассамблейн 300 гишүүнээс 204 гишүүн ерөнхийлөгч Юн Сук Ёлд  импичмент явуулах саналыг дэмжсэн билээ. Одоо тус улсын Үндсэн хуулийн цэц Юныг огцруулах эсэх асуудлаар хэлэлцэх юм. Хэрэв огцрох юм бол Юны дараагийн ерөнхийлөгчийг 60 хоногийн дотор сонгох учиртай. Эцсийн шийдвэр гарах хүртэл Юны бүрэн эрхийг түдгэлзүүлнэ.

Солонгосын сөрөг хүчний Ардчилсан намын дарга Ли Жэ Мён хэлэхдээ "Юн Сук Ёлын цэргийн дэглэмийн зарлигаас үүдэлтэй үндэсний эмх замбараагүй байдлыг багасгах цорын ганц арга зам бол шуурхай шийдвэр юм" гэжээ.