Гүржийн ерөнхийлөгчийн сонгуульд 53 настай Михаил Кавелашвили өрсөлдөгчгүйгээр ялалт байгууллаа. Барууныхныг хатуу шүүмжлэгч Михаил Кавелашвили нь эрх баригч "Гүржийн мөрөөдөл" намын гишүүн асан бөгөөд 1990-ээд оны үед Английн хөлбөмбөгийн "Манчестер Сити" багт тоглож байжээ.

Сонгуульд нэр дэвшсэн цор ганц нэр дэвшигч нь Михаил Кавелашвили байв. Яагаад гэвэл долоон жилийн өмнө Үндсэн хуульд оруулсан өөрчлөлтийн дагуу ерөнхийлөгчийг бүх нийтийн сонгуулиар бус парламент, орон нутгийн засаг захиргааны төлөөлөгчдөөс бүрдсэн 300 хүний санал хураалтаар сонгосон юм. Санал хураалтад нийт 225 сонгогч оролцсоны 224 нь цорын ганц нэр дэвшигч Кавелашвилигийн төлөө саналаа өгсөн байна.

Шинэ ерөнхийлөгч энэ сарын 29-нд тангарагаа өргөнө.

Сөрөг хүчнийхэн энэ засгийн газрыг хууль бус гэж үзэж байгаа тул засгийн газрыг хууль ёсны болгох аливаа үйл явцад оролцоогүй аж.

3.7 сая хүн амтай Гүрж улсад аравдугаар сарын 26-ны сонгуулиас хойш хурцадмал байдал үргэлжилсээр байна. Эрх баригч "Гүржийн мөрөөдөл" намыг барууны орнуудаас татгалзаж, Оросыг дэмжигч, авторитар бодлого баримталж байна гэж шүүмжилж буй. Барууныг шүүмжлэгч Кавелашвили ерөнхийлөгч болсноор Кремлийг дэмжигч хүчнүүд болон Европын холбоог дэмжигч жагсагчдын зөрчил улам хурцдах магадлалтай.

Ерөнхийлөгчийн сонгуулийн санал хураалтын өмнө парламентын ордны гадаа жагсагчид цугларчээ. Тэдний зарим нь хөлбөмбөг тоглож, ордон руу улаан хуудас даллах зэргээр Кавелашвилигийн спортын замналыг даапаалсан байна.