Монголын үндэсний бөхийн холбооны тэргүүлэгчдийн хурал энэ сарын 9-ний өдөр болж, зарим бөхчүүдэд цол нөхөн олгох тухай асуудлыг шийдвэрлэжээ. Тухайлбал, 2023 онд Говь-Алтай аймгийн баяр наадмын цол олгох барилдаанд түрүүлсэн Ховд аймгийн  Чандмань сумын харьяат аймгийн арслан У.Батцоожид хурц чимэг, 2024 онд Дорноговь аймгийн баяр наадамд түрүүлсэн аймгийн начин С.Занданхүүд аймгийн арслан, Орхон аймгийн баяр наадамд түрүүлсэн аймгийн нэмэх начин О.Баярбаасанд аймгийн арслан цол тус тус олгуулахаар шийдвэрлэж, тухайн аймгуудын удирдлага, бөхийн холбоонд албан бичиг хүргүүлжээ.

Дашрамд дурдахад улсын арслан Э.Оюунболдын барилдах эрхийг ирэх оны тавдугаар сард сэргээнэ гэдгээ МҮБХ мэдэгдээд байгаа юм. Энэ талаар МҮБХ-ны ерөнхий нарийн бичгийн дарга Т.Түмэндэмбэрэлээс тодрууллаа.

Т.Түмэндэмбэрэл:

-Баяр наадам зохион байгуулсан эдгээр аймгуудын эрх бүхий албан тушаалтнууд Үндэсний их баяр наадмын тухай хуулийг даган мөрдөж ажиллаагүйн улмаас тухайн бөхчүүд цол чимгээ авч чадаагүй. Тухайн бөхчүүдийн гаргасан өргөдлийг МҮБХ-ны тэргүүлэгчдийн хурлаар хэлэлцэж, цол чимгийг аймаг, цэргийн цолтой бөхчүүдийн амжилтын эрэмбэд оруулахаар олонхын саналаар тогтсон. МҮБХ-ноос албан бичигтээ  ҮИБНТХ-ийг даган мөрдөж ажиллах тус хуулийг сахин ажиллахгүйгээс баяр, наадмуудад барилдсан бөхчүүд хохирох асуудал гарч байгааг анхаарч ажиллах саналыг хүргүүлсэн гэлээ.

Д.Энхбаяр