Дагестаны нисэх онгоцны буудалд Израилийн эсрэг бослого гаргасан 10 хүнд Оросын өмнөд хэсгийн Ставрополь мужийн хоёр шүүх Лхагва гаригт найман жил гаруй хорих ял оноолоо гэж Ставрополь мужийн прокурорын газраас мэдэгдэв.

Тодруулбал, 2023 оны аравдугаар сарын 29-нд Тель-Авиваас нисч ирсэн Израиль жуулчидтай зодолдох гэж 1200 хүний ​​бүрэлдэхүүнтэй бүлэглэл Махачкалагийн олон улсын нисэх онгоцны буудал руу дайрчээ.

Их хэмжээний гэмтэл, хохирол учруулсан тус зодоон нь Палестин дахь Хамас бүлэглэлийн эсрэг Израилийн түрэмгийллийг буруутгасан Хойд Кавказын бүс нутгийн уур хилэнг илэрхийлсэн гэж Оросын хэвлэл онцолсон. Зодооны дараа 91 хүн шоронд хоригджээ.

Ставрополь хотын Александровскийн бүс нутгийн шүүх долоон эрэгтэйг үймээн самуун дэгдээсэн, хөдөлгөөний аюулгүй байдлын дүрэм зөрчсөн хэрэгт буруутай гэж үзсэн байна. Мөн тэдний нэг нь хууль сахиулагчийн эсрэг хүчирхийлэл үйлдсэн гэм буруутайд тооцогджээ.

Улмаар тухайн долоон хүнд 8-9 жилийн хорих ялыг дунд зэргийн дэглэмтэй хорих ангид эдлүүлэхээр шийдвэрлэсэн байна.

Ставрополь хотын Шпаковскийн бүс нутгийн шүүх өөр гурван хүнийг ижил хэрэгт буруутай гэж үзэн, найман жилээс найман жил хоёр сар хүртэл хорих ял оноожээ. Дашрамд дурдахад, наймдугаар сард өмнөд хэсгийн Краснодар мужийн шүүх Израилийн эсрэг үймээн дэгдээсэн гэх үндэслэлээр таван хүнд хорих ял оноосон юм.

Улмаар тус хэрэгт холбогдуулан нийт 15 эрэгтэй ял аваад байна.

Интерфакс агентлагийн мэдээлснээр, Ставропольд өөр 65 хүнийг шүүх ажиллагаа үргэлжилж буй. Учир нь хэргийн эмзэг байдлаас шалтгаалан шүүх хурлыг Дагестанаас шилжүүлсэн аж.