Оросын далавчит пуужингийн ахлах инженер Москвагийн ойролцоо буудуулж нас барсан талаар Украины хэвлэлүүд мэдээлэв. Түүнчлэн Украины тагнуулын албан хаагч түүнийг хөнөөсөн байх магадлалтай гэж онцолжээ.

Тодруулбал, Москвагийн зүүн өмнөд хэсэгт орших Котельники хотын захын Кузьминки ойн цэцэрлэгт хүрээлэнгээс энэ долоо хоногт Михаил Шацкийн цогцсыг олсон байна.

Тэрээр хиймэл дагуул болон нисгэгчгүй агаарын тээврийн хэрэгслийн автомат удирдлага, навигацийн системийг боловсруулдаг Москвагийн Ангараг гарагийн туршилтын зураг төслийн товчооны дизайны дэд дарга, программ хангамжийн дарга байсан. Товчилбол Ангараг гариг гэгдэх уг товчоо ​​нь Оросын цөмийн зэвсгийн "Росатом" корпорацын нэг хэсэг юм.

Цөллөгт байсан сөрөг хүчний сэтгүүлч Александр Невзоров хамгийн анх түүний үхлийн тухай олон нийтэд мэдээлэхдээ "Шацкий нь Х-59 пуужинг нам дор нисдэг Х-69 пуужин болгон шинэчлэх ажлыг удирдаж байсан" гэж онцолсон байв. Оросын арми Украины эсрэг Х-59, Х-69, Х-101 пуужингуудыг ашигладаг болох нь тогтоогдоод удаж буй. Жишээ дурдвал, Украины агаарын цэргийн хүчнийхэн Лхагва гаригт Днепропетровск мужийн дээгүүр нисч байсан  Х-59, Х-69 хоёр пуужинг сөнөөсөн гэдгээ мэдэгдсэн юм.

РБК, Украинская правда зэрэг хэд хэдэн мэдээллийн агентлаг Шацкийг Украины цэргийн "HUR" Батлан ​​хамгаалах тагнуулын агентлагийн тусгай ажиллагааны хүрээнд буудаж хөнөөсөн гэж нэргүй эх сурвалжаас иш татан мэдээлсэн байна.

Аюулгүй байдлын албаны нэрээ нууцалсан эх сурвалжаас иш татан Хромадске агентлаг мэдээлэхдээ “Оросын цэрэг-аж үйлдвэрийн цогцолборыг хөгжүүлэх, улмаар Украины эсрэг Оросын түрэмгийллийг дэмжихэд ямар нэгэн байдлаар оролцож байгаа хэн бүхэн Украины батлан ​​​​хамгаалах хүчний хууль ёсны бай болсон" гэж мэдэгджээ.

Оросын эрэн сурвалжлах мэдээллийн "Important Stories" сайтад Шацкий нас бардаг өдрөө Котельники дэх гэрээсээ 10 минутын зайнд алхаж хүрэх боломжтой газар буудуулсан байсан гэж нийтлэгдсэн байна.