АНУ-ын ерөнхийлөгч Жо Байден хүчирхийллийн бус гэмт хэрэг үйлдсэн 39 хүнд өршөөл үзүүлж, 1500 орчим хүний ялыг хөнгөлжээ. Цагаан ордноос онцлон тэмдэглэснээр энэ нь ерөнхийлөгч нэг өдрийн дотор хамгийн олон хүнд өршөөл үзүүлсэн тохиолдол байлаа.

АНУ-ын Үндсэн хуульд зааснаар ерөнхийлөгч импичментээс бусад тохиолдолд өршөөл үзүүлэх эрхтэй байдаг.

Өршөөлд хамрагдсан 39 хүн чухам ямар ямар гэмт хэрэг үйлдсэнийг Цагаан ордон тодорхой зарлаагүй. Ерөнхийд нь хүчирхийллийн бус гэмт хэрэг, хүчирхийллийн бус хар тамхины гэмт хэрэг гэж мэдэгджээ. Тэдний зарим нь шоронгоос суллагдаад нийгмийн үйл хэрэгт оролцож байгаа хүмүүс байжээ. "Өршөөлд хамрагдсан хүмүүс амжилттайгаар хүмүүжиж, нийгмээ илүү хүчирхэг бөгөөд аюулгүй болгох амлалтаа батлан харуулсан" гэж Байден хэлсэн байна.

Тухайлбал, Виржиниагийн оршин суугч, 49 настай хүний талаар Цагаан ордон дурдсан. Тухайн хүн нь хар тамхины хэргээс болж 21 насандаа ял авсан бөгөөд ялаа эдэлж дуусаад их сургуульд сурч, улмаар АНУ-ын арми, Агаарын хүчинд амжилттайгаар карьер хөөжээ.

Харин ял хөнгөрүүлсэн 1500 хүний зарим нь Covid-19-ийн үеэр гэрийн хорионд орсон бол зарим нь хүчингүй болсон хуулийн дагуу хэт урт ял эдэлж байсан хүмүүс байжээ.

Энэ удаагийн шийдвэрийг эс тооцвол Байден АНУ-ын бүх ерөнхийлөгчөөс хамаагүй цөөн тооны хүнд өршөөл үзүүлсэн түүхтэй. 2022 оны аравдугаар сард тэр марихуан хадгалсан хэргээр ял шийтгүүлсэн хүмүүст бүрэн өршөөл үзүүлж, дараа нь үүнийгээ марихуантай холбоотой бусад гэмт хэргүүдийг хамруулан өргөжүүлсэн байна. Мөн бэлгийн чиг баримжаанаасаа болж буруутгагдсан цэргийн алба хаагчид болон ахмад дайчдад энэ оны эхээр бүрэн өршөөл үзүүлжээ.

Дашрамд дурдахад, Трамп анхны бүрэн эрхийн хугацаандаа 237 өршөөл үзүүлж байжээ. Үүний 143 нь өршөөл, 94 нь ял хөнгөрүүлэлт байв. Энэ удаад тэрбээр ажил үүргээ хүлээж авмагцаа Капитолын үймээнээс болж ял сонссон хүмүүсийг өршөөнө гэдгээ мэдэгдээд байна.