АНУ, Канадын хамгийн том алдааг Элтон Жон нэрлэв

Энэ цаг үеийн шилдэг дуучдын нэг Элтон Жон марихуаныг хуульчилсан явдалд үзэл бодлоо илэрхийлэхээс буцсангүй. Тодруулбал, 2024 оны хамгийн онцлох буюу "Icon of the Year"-ээр нэрлэгдээд буй домогт дуучин Элтон Жон "Time" сэтгүүлд өгсөн ярилцлагадаа АНУ, Канадын зарим хэсэгт каннабисыг хууль ёсны болгосонд өөрийн бодлоо хуваалцжээ. Тэрбээр хэлэхдээ "Энэ нь донтуулдаг гэдгийг би батална. Энэ нь бусад мансууруулагч бодисыг хэрэглэж эхлэхэд хүргэдэг. Мансуурсан байхад , би ч мөн адил, хүн эрүүлээр сэтгэдэггүй" гэжээ.

Түүнчлэн "АНУ болон Канадад марихуаныг хуульчилсан нь бүх цаг үеийн хамгийн том алдаа" гэж шүүмжилсэн байна.

Тэрбээр донтолттойгоо тэмцэж, ялалт байгуулсан хүнийхээ хувьд орчин үеийн залуусыг мансууруулах бодисоос хол байхыг уриалдаг билээ."Time" сэтгүүлийн зүгээс Элтон Жоны талаар онцлохдоо "Тэр бол Эминемийн ивээн тэтгэгч. Түүний ачаар Английн поп од Робби Уильямс анхны мансууралтай тэмцэх эмчилгээндээ орж байсан" гэж нийтэлсэн байна. Гэхдээ Элтон Жоны мансуурлаас ангижрахад нь тусалж чадаагүйдээ хамгийн их харамсдаг уран бүтээлч бол 2016 онд зүрх, элэгний өвчнөөр нас барсан Жорж Майкл юм. Тэрээр нас барахдаа дөнгөж 53 настай байсан бөгөөд олон жил хар тамхины донтолтоо ялан дийлэх гэж хичээж байв.

Жорж Майклийг донтолттойгоо тэмцэхэд нь туслах оролдлого хийж байсан талаараа Элтон Жон хэлэхдээ "Хүнийг ямар хогийн зан гаргаж байгааг хэлэх хэцүү. Хэлүүлэхэд ч хэцүү байдаг шүү дээ. Эцэст нь би өөрөө хогийн зан гаргаж байгаагаа хүлээн зөвшөөрөх сонголт хийсэн" гэжээ.

Элтон Жоны олон жил хамтран ажилласан Берни Таупин түүний мансууруулах бодист донтсон байх үеийг дурсахдаа "Би түүнд маш их санаа зовдог байсан. Тэр үед үнэхээр аймшигтай байсан" гэсэн юм. Мөн "Түүнийг хамгийн доод түвшиндээ хүрсэн байхад хамтарч ажиллахад үнэхээр хүндрэлтэй, хэн хэнд маань сайн зүйл дагуулаагүй. Түүнийг өөрийгөө эргэн олох хүртэл би түүнд зориулсан уран бүтээлүүддээ хангалттай хэмжээнд цаг зав гаргаж чаддаггүй байлаа. Эцэст нь мансууралтаа ялан дийлсэн Элтон ямар өндөр мэдрэмжтэй нэгэн болохыг мэдсэнээр би ч ялгаагүй өөртөө дүн шинжилгээ хийсэн" гэжээ.

ЭХ СУРВАЛЖ: CNN