"FOXNews"-ийн хөтлөгч асан, улс төрийн мэтгэлцэгч  Такер Карлсон өнгөрсөн хоёрдугаар сард ерөнхийлөгч Владимир Путинтэй хийсэн ярилцлагынхаа дараа Гадаад хэргийн сайд Сергей Лавровтой ярилцлага хийхээр дахин Орост очжээ. Карлсон болон Лавров нар АНУ-Оросын харилцаа, Вашингтоны гадаад бодлого, сүүлийн үед Орешник пуужинг Кремль ашиглах болсон зэрэг сэдвүүдийг хөндсөн байна. Ярилцлагын туршид Лавров Украины эсрэг явуулж буй дайны тухай Оросын үргэлж хэлдэг үгсийг давтаж, Буча хотод болсон хүчирхийлэл үнэн эсэх, Алексей Навальный, Сергей, Юлия Скрипал нарыг "Новичок" мэдрэлд нөлөөлдөг бодис ашиглан хордуулсан талаар эргэлзээтэй хариултыг өгчээ. "The Moscow Times" агентлаг тус ярилцлагад дурдсан хэд хэдэн сэдвийг нягталжээ.

1. "Америкийн цэргийнхэн Орос руу алсын тусгалтай пуужингаар харваж байна – Лавров, Карлсон"

Карлсон энэхүү ярилцлагыг зарлахдаа "Америкийн цэргийн албан хаагчид эх газрын Орос руу пуужин харвасан" гэж итгэлтэйгээр мэдэгдсэн байдаг. Лавровын хувьд АНУ-ын цэргийн алба хаагчидгүйгээр Украин дайтаж чадахгүй гэж мэдэгджээ.

Америкийн цэргийн албан хаагчид Орос руу эсвэл Украин дахь бай руу АТАКМС болон бусад барууны пуужингийн системийг хөөргөж байгаа гэх нотлох баримт байхгүй. Киев АНУ-аас хандивласан АТАКМС пуужинг хөөргөхдөө HIMARS платформыг ашигладаг. Үүнийг хэрхэн ашиглах талаар АНУ, Герман, Польш улсад Украины цэргийн албан хаагчдыг сургасан байдаг.

2. "Орос Украинд дайн эхлүүлээгүй – Лавров"

Путины адилаар Лавров Украины дайнд “NATO” болон барууныхныг буруутгахыг хичээж, Орос улс 2022 оны хоёрдугаар сард тус улс руу бүрэн довтолж, нийслэл Киевийг эзлэхийг оролдсон ч эхлэлийг нь тавиагүй гэж мэдэгджээ.

3. "Орос улс аль ч улс орны хүн амыг цөмийн зэвсгээр устгах тухай яриагүй- Лавров"

Дайн эхэлснээс хойш Оросын эрх баригчид 200 гаруй удаа цөмийн зэвсгийн талаар дурдсан мэдээлэл хийсэн байна. Эдгээр мэдэгдлүүдийн ихэнх нь, тэр дундаа Лавровын зарим мэдэгдэл нь цөмийн зэвсгийн хурцадмал байдал "хяналтаас гарч" үхлийн аюултай үр дагаварт хүргэх тухай байдаг. Цаашилбал, төрийн телевизээр суртал ухуулагчид Орос улс “NATO”-гийн гишүүн орнуудыг устгах, тэр дундаа Их Британийг цацраг идэвхт цунамигаар арчиж устгахын тулд цөмийн зэвсэг ашиглах болно гэж сайрхсан удаа бий.

4. "Бучагийн аллага эргэлзээ төрүүлж байна – Лавров"

Украины Буча хотод орос цэргүүд энгийн иргэдийг хоморголон устгасан гэх мэдээлэл цацагдаж байсан. Кремлийн бусад албан тушаалтны нэгэн адилаар Лавров үүнийг үнэн гэж хүлээн зөвшөөрөхгүй гэдгээ мэдэгджээ. Тэрбээр орос цэргүүд аллага үйлдсэн гэх нотлох баримт нь зохиомол бөгөөд илт өдөөн хатгасан худал мэдээлэл гэж буруутгасан байна.

Үнэн хэрэгтээ гэрчүүдийн мэдүүлэг, яриа авсан видео бичлэгээс гадна Оросын анги нэгтгэлүүдийн хоорондох утас, радио холбооны бүртгэл, эзлэн түрэмгийллийн үеэр гудамжинд тараагдсан цогцсуудыг харуулсан хиймэл дагуулын зураг зэрэг Бучад хомроглон устгах ажиллагаа явуулсан гэдгийг нотлох баримтууд бий. Лавров ярилцлагын туршид украиньчуудын эсрэг ямар ч аллага болоогүй гэж албан ёсоор мэдэгдээгүй. Гэсэн хэдий ч тэрбээр Оросын армийг буруутгаж буй нь зөв эсэхийг нотлохын тулд амь үрэгдсэн хүмүүсийн албан ёсны жагсаалтыг НҮБ-аас Кремльд олгохыг удаа дараа хүссэн гэдгээ Карлсонд хэлжээ. Гэвч аллагын хохирогчид хэн болох нь нууц биш юм. Буча хотын шарилын газрууд танигдсан болон үл мэдэгдэх цогцсуудын жагсаалтыг олон нийтэд ил болгосон байдаг. Мөн хотын зөвлөлөөс амиа алдагсдыг баталгаажуулсан жагсаалтыг хүсэлт илгээн үзэх боломжтой.

5, "Оросууд үнэхээр Навальныйг хордуулсан уу? – Лавров"

Орост үйлдвэрлэсэн мэдрэлд нөлөөлөх чадалтай Новичак бодисоор Кремлийг шүүмжлэгч Навальныиг хордуулж, хөнөөх гэж оролдсон үгүйг нотлох Германд хийсэн шинжилгээний хариуг барууныхан нууж байна гэж Лавров үзэж буй.

Гэсэн хэдий ч 2021 оны нэгдүгээр сард Берлиний Чарите эмнэлгээс Навальныйг хянаж байсан эмч нарын эмнэлзүйн тайланг анагаах ухааны "Lancet" сэтгүүлд нийтэлсэн байдаг. Навальный уг тайланг "Оросын шаардаж буй хордсоныг нотлох баримт" гэж нэрлэжээ.

6. "Азовын тэнгис дэх Их Британийн тэнгисийн цэргийн баазыг байгуулах төлөвлөгөө – Лавров"

Лондон, Киевийн эрх баригчид 2021 онд Украины тэнгисийн цэргийн хүчин чадлыг нэмэгдүүлэх гэрээ байгуулсан. Үүнд шинэ байлдааны хөлөг онгоц үйлдвэрлэх гэрээ, Хар тэнгис, Азовын тэнгист хоёр шинэ тэнгисийн цэргийн бааз барих гэрээ багтсан юм. Үүнийг Украины төлөө биш Их Британи өөртөө зориулж гэрээ байгуулсан гэж Лавров хэлсэн байна.

Үнэн хэрэгтээ, эдгээр төлөвлөгөө, гэрээ нь Украины нутаг дэвсгэрт байрлах Британийн хааны тэнгисийн цэргийн бааз биш. Энэ нь Их Британийн дэмжлэгтэйгээр баригдах Украины баазуудад зориулагдсан байв.

7. "Зеленский "Ардчилсан байдлаар сонгогдсон Украины ерөнхийлөгч" байхаа больсон – Карлсон"

Зеленскийн ерөнхийлөгчийн бүрэн эрхийн хугацаа 2024 оны тавдугаар сард буюу гуравдугаар сард болдог байсан сонгуулийн дараа дуусгавар болох байсан.

Украинд 2022 оны хоёрдугаар сарын 24-нд зарласан дайны онц байдлын дагуу сонгууль явуулахыг шууд хориглосон юм. Улмаар зарим шүүмжлэгчид Зеленский ерөнхийлөгч хэвээр үлдэж байгаа нь Үндсэн хууль зөрчсөн явдал гэж үзэж байна. Гэсэн хэдий ч Зеленскийн засгийн газрыг шүүмжилдэг “The Kyiv Independent”сэтгүүлд Үндсэн хуулийн хуульчид түүнийг хууль ёсоор зөвшөөрсөн бөгөөд дайны үед сонгууль явуулах боломжгүй гэж мэдэгджээ. Дайны онц байдал Украины иргэдийн зарим үндсэн эрхийг зөрчиж байгаа ч геополитикийн хямралын үед Зеленскийг суудалд нь хэвээр үлдээх шаардлагатай гэж Европын Комисс тогтоожээ.

8. "Зеленский Оростой энхийн хэлэлцээ хийхийг хориглов – Лавров"

Путин өмнө нь Карлсонтой ярилцахдаа ижил төстэй утга бүхий зүйл хэлж байжээ. Гэхдээ энэ нь буруу юм.

Зелеснскийн хуулийн төсөлд Путинтэй хэлэлцээ хийхийг хориглосон боловч Оросын өөр ерөнхийлөгчтэй хэлэлцэх үүд хаалгыг нээлттэй үлдээнэ гэж онцолсон байдаг.