2024 оны сурагчдын Ази тивийн аварга шалгаруулах шатрын тэмцээн Тайландын Бангкок хотод арванхоёрдугаар сарын 1-11-ний өдрүүдэд зохион байгуулагдлаа. Тус тэмцээний долоо хүртэлх насны хөвгүүдийн ангилалд Дорноговь аймгийн "Хутагтын мэлмий" клубийн тамирчин У.Ухаанбилэг түрүүлж тивийн аварга болжээ.

Тэрбээр есөн өргөөс 7.5 оноо авч, нэг ч хожигдолгүй тоглосноор аваргын алтан медаль хүртсэн байна. 

У.Ухаанбилэг 2023 оны өсвөрийн шатарчдын Монгол Улсын аварга, 2024 оны сурагчдын улсын аварга шалгаруулах "Цодгор хүү" тэмцээний аваргаар тус тус шалгарч байжээ. 2024 оны сурагчдын Ази тивийн аварга шалгаруулах шатрын тэмцээнд нийт 534 өсвөрийн шатарчин оролцсоноос манай улсын 43 тамирчин өрсөлдсөн байна.