Дэлхийн хамгийн баян хүн Элон Маскийн хөрөнгийн хэмжээ Дональд Трампийн ялалтаас хойш улам нэмэгдсээр байна. Түүний хөрөнгө 400 тэрбум ам.доллар давж, нэгэн шинэ түүх бүтээв. "Bloomberg"-ийн мэдээлснээр Маск "SpaceX"-ын хувьцааг худалдсан нь түүний хөрөнгийн өсөлтөд томоохон түлхэц болжээ. Түүнчлэн "Tesla"-ийн хувьцааны үнэ Лхагва гаригт түүхэн дээд хэмжээ тогтоосноор Маскийн нийт хөрөнгө 447 сая ам.доллар хүрсэн байна.

Маскийн хөрөнгө нэг өдөрт 62.8 тэрбум ам.доллараар өссөн нь түүхэн дэх хамгийн их хэмжээний өсөлт юм. Энэ өсөлтийн тусламжтайгаар дэлхийн хамгийн баян 500 хүний ​​нийт хөрөнгө 10 их наяд ам.доллар давжээ. Энэ нь ч бас түүхэн үзүүлэлт болж байна. Дэлхийн баячуудын хөрөнгө өнгөрсөн оны Герман, Япон, Австралийн дотоодын нийт бүтээгдэхүүнтэй ойролцоо болсныг Дэлхийн банк мэдээлэв.

Маск 2024 он гарснаас хойш нийт хөрөнгөө 218 тэрбум ам.доллараар нэмжээ. Энэ нь бусад баячуудаас хамаагүй илүү өсөлт болж байна. Түүний хөрөнгийн дийлэнх хувийг бүрдүүлдэг "Tesla"-ийн хувьцаа энэ онд 71 хувиар өссөн юм. Трамп автомат жолоодлоготой автомашины үйлдвэрлэлийг сайжруулж, цахилгаан тээврийн хэрэгслийн татварын хөнгөлөлтийг арилгана гэсэн нь компанийн хувьцааг өсгөхөд нөлөөлжээ.

Үүний зэрэгцээ Маскийн "xAI" компанийн хөрөнгө ч бас тавдугаар сараас хойш хоёр дахин өсч, 50 тэрбум ам.доллар хүрсэн байна.