Башар аль-Ассадын засгийн газар нуран унасан боловч Оросын арми Сири дэх баазууддаа байрласан хэвээр байна. Сирид Кремлийн хоёр ч томоохон байгууламж байдаг. Эдгээр нь Тартус дахь тэнгисийн цэргийн бааз, Хмеймим агаарын баазууд бөгөөд Оросыг Газар дундын тэнгис, Африк руу нэвтрэхэд чухал үүрэг гүйцэтгэдэг.

Хиймэл дагуулын зураг харахад Тартус баазыг Даваа гаригаас хойш чөлөөлж эхэлсэн боловч бүрэн нүүлгэн шилжүүлээгүй аж. Тэндээс хөдөлсөн байлдааны хөлөг онгоцууд эргэж очих нь тодорхойгүй байна. Хэрвээ бүрэн чөлөөлөх байсан бол илүү олон хөлөг онгоц шаардагдахыг Карнегигийн Олон улсын энх тайвны сангийн ахлах ажилтан Дара Массикот хэлжээ.

Сири дэх нөхцөл байдал тодорхойгүй байгаа учир ОХУ хөлөг онгоцуудаа хамгаалахын тулд далайд түр шилжүүлсэн байх магадлалтай гэж эндээс дүгнэв. Үндсэндээ Ассадын дараах Сири хэрхэх нь тодорхойгүй байгаа учир Оросын хувьд ч нөхцөл байдал адил гэж үзэж байна.

Хмеймим агаарын бааз нь Оросын хувьд Африк руу цэргээ илгээх гол суваг болдог. Тус баазын хиймэл дагуулын зургийг харахад Кремлийн сөнөөгч онгоц, нисдэг тэрэг зэрэг ихэнх техник хэрэгсэл нь хаашаа ч хөдлөөгүй хэвэндээ байна. Хмеймим баазыг нүүлгэн шилжүүлье гэвэл цөөн хэдэн онгоц биш Ил-76, Ан-124 онгоц маш олон тоогоор хэрэг болох юм. Гэтэл энэ долоо хоногийн эхээр Хмеймим баазад Илюшин, Антонов ачааны онгоц л хэд хэд харагджээ.

ОХУ 2015 онд цэргүүдээ Сирид байрлуулахдаа хоёр долоо хоногийн дотор бараг 300 нислэг үйлдсэн. Энэ нь баазыг өргөтгөхөөс өмнөх үйл явдал аж.

Харин Украины тагнуулын хэлтэс энэ талаар мэдээлэхдээ "ОХУ Хмеймимийг нүүлгэн шилжүүлэх төлөвлөгөөтэй байгаа. Мөн Оросын цэргүүд тусгай хүчний хяналт дор Тартус дахь техник хэрэгслээ задалж эхэлсэн" гэжээ.